hathon mein kaman un ke ho dil mera nishan ho

hāthoñ meñ kamāñ un ke ho dil merā nishāñ ho

mumkin hai mohabbat bhī mohabbat kā gumāñ ho

ik aag bhaḌaktī hī rahe dil meñ hamesha

ik dhuup lage aisī ki tan merā dhuāñ ho

tum mere liye daulat-e-jannat se nahīñ kam

tum merā tasavvur ho mirī 'aql-e-fishāñ ho

DhūñDūñ tumheñ nazroñ meñ ye mumkin hī nahīñ hai

tum dil ke taqāze meñ nihāñ jān-e-jahāñ ho

mumkin hai ki poshīda ho ik 'umr-e-tabassum

mumkin hai 'ayāñ aañkh meñ ik ḳhvāb-e-girāñ ho

jo 'ishq huā hai to hai taslīm hameñ sab

vo barq-e-tapāñ ho ki koī nok-e-sināñ ho

ḳhushbū se mo'attar ho tire she'r kā markaz

phūloñ kā mahaknā tirā andāz-e-bayāñ ho

mar jaane kī chāhat to hai 'kāvish' hameñ lekin

kyā kījiye gar chain yahāñ ho na vahāñ ho

hathon mein kaman un ke ho dil mera nishan ho

mumkin hai mohabbat bhi mohabbat ka guman ho

ek aag bhaDakti hi rahe dil mein hamesha

ek dhup lage aisi ki tan mera dhuan ho

tum mere liye daulat-e-jannat se nahin kam

tum mera tasawwur ho meri 'aql-e-fishan ho

DhunDun tumhein nazron mein ye mumkin hi nahin hai

tum dil ke taqaze mein nihan jaan-e-jahan ho

mumkin hai ki poshida ho ek 'umr-e-tabassum

mumkin hai 'ayan aankh mein ek KHwab-e-giran ho

jo 'ishq hua hai to hai taslim hamein sab

wo barq-e-tapan ho ki koi nok-e-sinan ho

KHushbu se mo'attar ho tere she'r ka markaz

phulon ka mahakna tera andaz-e-bayan ho

mar jaane ki chahat to hai 'kawish' hamein lekin

kya kijiye gar chain yahan ho na wahan ho