hathon mein tha ek hath abhi kal ki baat hai

hāthoñ meñ thā ik haath abhī kal kī baat hai

jannat thī kā.enāt abhī kal kī baat hai

nairangī-e-bahār-e-chaman ta.ana-zan hai kyoñ

rangīn thī hayāt abhī kal kī baat hai

itne baḌe jahāñ meñ akelā nahīñ thā maiñ

vo bhī the mere saath abhī kal kī baat hai

dil bhī thā aap bhī the javāñ hasrateñ bhī thiiñ

kyā kyā the vāqi.āt abhī kal kī baat hai

tabdīl ho gayā hai jo miTTī ke Dher meñ

vo dil thā somnāt abhī kal kī baat hai

aaj un ko dekhnā bhī muqaddar nahīñ rahā

hotī thī un se baat abhī kal kī baat hai

hañsiye na mujh pe vaqt kī mīzān dekhiye

din se sivā thī raat abhī kal kī baat hai

mere liye thā dosto har roz roz-e-īd

thī shab shab-e-barāt abhī kal kī baat hai

aaj 'ehtishām' koī bhī qīmat nahīñ rahī

thī apnī baat baat abhī kal kī baat hai

hathon mein tha ek hath abhi kal ki baat hai

jannat thi kaenat abhi kal ki baat hai

nairangi-e-bahaar-e-chaman tana-zan hai kyon

rangin thi hayat abhi kal ki baat hai

itne baDe jahan mein akela nahin tha main

wo bhi the mere sath abhi kal ki baat hai

dil bhi tha aap bhi the jawan hasraten bhi thin

kya kya the waqiat abhi kal ki baat hai

tabdil ho gaya hai jo miTTi ke Dher mein

wo dil tha somnat abhi kal ki baat hai

aaj un ko dekhna bhi muqaddar nahin raha

hoti thi un se baat abhi kal ki baat hai

hansiye na mujh pe waqt ki mizan dekhiye

din se siwa thi raat abhi kal ki baat hai

mere liye tha dosto har roz roz-e-id

thi shab shab-e-baraat abhi kal ki baat hai

aaj 'ehtisham' koi bhi qimat nahin rahi

thi apni baat baat abhi kal ki baat hai