had se guzri hai ibtila meri

had se guzrī hai ibtilā merī

ab to sun le mirā ḳhudā merī

aaj begāna vo nigāheñ haiñ

thiiñ jo muddat se āshnā merī

kaun kartā hai mujh ġharīb pe rahm

kaun suntā hai iltijā merī

huuñ vo bīmār-e-ġham ki mushkil se

kar sakegā koī davā merī

na milā dil kā qadr-dāñ na milā

yuuñ hī rusvā huī vafā merī

koī insāf bhī hai duniyā meñ

baḌh ga.ī jurm se sazā merī

baat kuchh ban ga.ī to jānūñgā

kaam kuchh kar ga.ī duā merī

DhūñDhtā huuñ sukūn-e-dil 'hairat'

ye ḳhatā hai to hai ḳhatā merī

had se guzri hai ibtila meri

ab to sun le mera KHuda meri

aaj begana wo nigahen hain

thin jo muddat se aashna meri

kaun karta hai mujh gharib pe rahm

kaun sunta hai iltija meri

hun wo bimar-e-gham ki mushkil se

kar sakega koi dawa meri

na mila dil ka qadr-dan na mila

yun hi ruswa hui wafa meri

koi insaf bhi hai duniya mein

baDh gai jurm se saza meri

baat kuchh ban gai to jaanunga

kaam kuchh kar gai dua meri

DhunDhta hun sukun-e-dil 'hairat'

ye KHata hai to hai KHata meri