hadd-e-nigah dhup si bikhri hui lagi

hadd-e-nigāh dhuup sī bikhrī huī lagī

tere baġhair ek sazā zindagī lagī

sochā thā maiñ ne hañs ke guzar jā.uñgā magar

chalne pe raah ziist kī kāñToñ bharī lagī

duniyā hasīñ hai is kī har ik shai hasīñ magar

dil ko bhalī lagī to tirī sādgī lagī

us kā vujūd ho gayā mahsūs jis ghaḌī

ghar kī har ek chiiz mahaktī huī lagī

vo talḳhī-e-qazā ho ki rangīni-e-hayāt

sab meñ tirī nigāh kī jādūgarī lagī

kahte haiñ log bevafā us ko magar mujhe

kuchh apne pyaar apnī vafā meñ kamī lagī

jaise ki shab ke saath juḌī rahtī hai sahar

ranj-o-ḳhushī meñ bhī yūñhī vābastagī lagī

tū yuuñ basā huā hai dil-o-zehn meñ mire

jis bazm meñ gayā mujhe mahfil tirī lagī

nazreñ churā ke jaate use aaj dekh kar

qadmoñ tale zamīn saraktī huī lagī

aisī hai kyā ki jaan hī paayā na maiñ use

hastī bas ek ḳhvāb to kyā ḳhvāb sī lagī

'gulshan' vo jis ghaḌī se mire ham-safar hue

har raah zindagī kī chamaktī huī lagī

hadd-e-nigah dhup si bikhri hui lagi

tere baghair ek saza zindagi lagi

socha tha main ne hans ke guzar jaunga magar

chalne pe rah zist ki kanTon bhari lagi

duniya hasin hai is ki har ek shai hasin magar

dil ko bhali lagi to teri sadgi lagi

us ka wujud ho gaya mahsus jis ghaDi

ghar ki har ek chiz mahakti hui lagi

wo talKHi-e-qaza ho ki rangini-e-hayat

sab mein teri nigah ki jadugari lagi

kahte hain log bewafa us ko magar mujhe

kuchh apne pyar apni wafa mein kami lagi

jaise ki shab ke sath juDi rahti hai sahar

ranj-o-KHushi mein bhi yunhi wabastagi lagi

tu yun basa hua hai dil-o-zehn mein mere

jis bazm mein gaya mujhe mahfil teri lagi

nazren chura ke jate use aaj dekh kar

qadmon tale zamin sarakti hui lagi

aisi hai kya ki jaan hi paya na main use

hasti bas ek KHwab to kya KHwab si lagi

'gulshan' wo jis ghaDi se mere ham-safar hue

har rah zindagi ki chamakti hui lagi