hadd-e-sitam na kar ki zamana KHarab hai

hadd-e-sitam na kar ki zamāna ḳharāb hai

zālim ḳhudā se Dar ki zamāna ḳharāb hai

itnā na ban-sañvar ki zamāna ḳharāb hai

mailī nazar se Dar ki zamāna ḳharāb hai

bahnā paḌegā vaqt ke dhāre ke saath saath

ban us kā ham-safar ki zamāna ḳharāb hai

phislan qadam qadam pe hai bāzār-e-shauq meñ

chal dekh-bhāl kar ki zamāna ḳharāb hai

kuchh un pe ġhaur kar jo taqāze haiñ vaqt ke

un se nibāh kar ki zamāna ḳharāb hai

aa ġharq-e-jām kar deñ mile haiñ jo ranj-o-ġham

paimāna merā bhar ki zamāna ḳharāb hai

gar be-Thikāna haiñ to nahīñ sharmsār ham

ab kyā banā.eñ ghar ki zamāna ḳharāb hai

mehnat shu.ūr tajraba ta.alīm-o-tarbiyat

sab kuchh hai be-asar ki zamāna ḳharāb hai

do roTiyāñ nahīñ na sahī ek hī sahī

is par hī sabr kar ki zamāna ḳharāb hai

hadd-e-sitam na kar ki zamana KHarab hai

zalim KHuda se Dar ki zamana KHarab hai

itna na ban-sanwar ki zamana KHarab hai

maili nazar se Dar ki zamana KHarab hai

bahna paDega waqt ke dhaare ke sath sath

ban us ka ham-safar ki zamana KHarab hai

phislan qadam qadam pe hai bazar-e-shauq mein

chal dekh-bhaal kar ki zamana KHarab hai

kuchh un pe ghaur kar jo taqaze hain waqt ke

un se nibah kar ki zamana KHarab hai

aa gharq-e-jam kar den mile hain jo ranj-o-gham

paimana mera bhar ki zamana KHarab hai

gar be-Thikana hain to nahin sharmsar hum

ab kya banaen ghar ki zamana KHarab hai

mehnat shuur tajraba talim-o-tarbiyat

sab kuchh hai be-asar ki zamana KHarab hai

do roTiyan nahin na sahi ek hi sahi

is par hi sabr kar ki zamana KHarab hai