hadis-e-ahd-e-guzishta hai ham-nashinon mein

hadīs-e-ahd-e-guzishta hai ham-nashīnoñ meñ

chhalak rahī hai sharāb aaj ābgīnoñ meñ

niyāz-mandī-e-yaktā-e-husn ke mūjib

hamāre naam kā charchā hai nāznīnoñ meñ

qafas kī tīliyāñ ham phūñkne ko ai sayyād

chhupā ke bijliyāñ laa.e haiñ apne sīnoñ meñ

hai ḳhud-farebī-e-zāhid kī muntahā ya.anī

zabāñ pe nām-e-ḳhudā but haiñ āstīnoñ meñ

bapā hai hashr kā tūfān bahr-e-hastī meñ

haiñ mahv-e-ḳhvāb magar nāḳhudā safīnoñ meñ

vo 'soz' aaj samā.e hue haiñ sāñsoñ meñ

kabhī ḳhayāl meñ aate the jo mahīnoñ meñ

hadis-e-ahd-e-guzishta hai ham-nashinon mein

chhalak rahi hai sharab aaj aabginon mein

niyaz-mandi-e-yakta-e-husn ke mujib

hamare nam ka charcha hai nazninon mein

qafas ki tiliyan hum phunkne ko ai sayyaad

chhupa ke bijliyan lae hain apne sinon mein

hai KHud-farebi-e-zahid ki muntaha yani

zaban pe nam-e-KHuda but hain aastinon mein

bapa hai hashr ka tufan bahr-e-hasti mein

hain mahw-e-KHwab magar naKHuda safinon mein

wo 'soz' aaj samae hue hain sanson mein

kabhi KHayal mein aate the jo mahinon mein