hai aab aab mauj bipharne ke bawajud

hai aab aab mauj bipharne ke bāvajūd

duniyā simaT rahī hai bikharne ke bāvajūd

rāh-e-fanā pe log sadā gāmzan rahe

har-har nafas pe maut se Darne ke bāvajūd

is bahr-e-kā.enāt meñ har kashtī-e-anā

ġharqāb ho ga.ī hai ubharne ke bāvajūd

shāyad paḌī hai raat bhī saare chaman pe os

bhīge hue haiñ phuul nikharne ke bāvajūd

zer-e-qadam hai chāñd sitāre haiñ gard-e-rāh

dhartī pe āsmāñ se utarne ke bāvajūd

tūfāñ meñ Duub kar ye huā mujh pe inkishāf

paanī thī sirf mauj bipharne ke bāvajūd

maiñ us maqām par to nahīñ aa gayā kahīñ

hogī na sub.h raat guzarne ke bāvajūd

alfāz-o-saut-o-rang-o-tasavvur ke ruup meñ

zinda haiñ log aaj bhī marne ke bāvajūd

ib.hām-e-āgahī se maiñ apne vajūd kā

iqrār kar rahā huuñ mukarne ke bāvajūd

hai aab aab mauj bipharne ke bawajud

duniya simaT rahi hai bikharne ke bawajud

rah-e-fana pe log sada gamzan rahe

har-har nafas pe maut se Darne ke bawajud

is bahr-e-kaenat mein har kashti-e-ana

gharqab ho gai hai ubharne ke bawajud

shayad paDi hai raat bhi sare chaman pe os

bhige hue hain phul nikharne ke bawajud

zer-e-qadam hai chand sitare hain gard-e-rah

dharti pe aasman se utarne ke bawajud

tufan mein Dub kar ye hua mujh pe inkishaf

pani thi sirf mauj bipharne ke bawajud

main us maqam par to nahin aa gaya kahin

hogi na subh raat guzarne ke bawajud

alfaz-o-saut-o-rang-o-tasawwur ke rup mein

zinda hain log aaj bhi marne ke bawajud

ibham-e-agahi se main apne wajud ka

iqrar kar raha hun mukarne ke bawajud