hai ajib kashmakash mein gham-e-arzu ka mara

hai ajiib kashmakash meñ ġham-e-ārzū kā maarā

na to arz-e-ġham kā yaarā na kahe baġhair chārā

kaheñ us se haal kyā jo na samajh sake ishārā

ġham-e-ishq ko ye zillat nahīñ hashr tak gavārā

maiñ nahīñ huuñ mauj-e-muztar jo ho be-qarār-e-sāhil

maiñ ġharīq-e-bahr-e-ġham huuñ mujhe DhūñD le kinārā

mujhe kyā miTā sakeñge ġham-e-hijr ke ye tūfāñ

ki abhī hai mere bas meñ tirī yaad kā sahārā

na kahīñ kā mujh ko rakkhā tirī aarzū ne zālim

maiñ jahāñ bhī jā ke Duubā vahīñ mil gayā kinārā

mirī saḳht-jānī bar-haq magar is kā pūchhnā kyā

tire hijr kā zamāna banā jis tarah guzāra

maiñ harīf-e-kashmakash huuñ hai jagah mirī talātum

jise maut kī ho ḳhvāhish vahī DhūñD le kinārā

tire pūchhne ke sadqe ġham-e-dil kā mājrā kyā

tire lutf ne jalāyā tirī be-ruḳhī ne maarā

mirī aarzū aur un ko kahīñ ḳhvāb to nahīñ hai

ye kahāñ chamak rahā hai mire baḳht kā sitārā

hai ajiib chiiz 'sāhir' ye muqaddar-e-vafā bhī

ki usī ko ham ne chāhā jo na ho sake hamārā

hai ajib kashmakash mein gham-e-arzu ka mara

na to arz-e-gham ka yara na kahe baghair chaara

kahen us se haal kya jo na samajh sake ishaara

gham-e-ishq ko ye zillat nahin hashr tak gawara

main nahin hun mauj-e-muztar jo ho be-qarar-e-sahil

main ghariq-e-bahr-e-gham hun mujhe DhunD le kinara

mujhe kya miTa sakenge gham-e-hijr ke ye tufan

ki abhi hai mere bas mein teri yaad ka sahaara

na kahin ka mujh ko rakkha teri aarzu ne zalim

main jahan bhi ja ke Duba wahin mil gaya kinara

meri saKHt-jaani bar-haq magar is ka puchhna kya

tere hijr ka zamana bana jis tarah guzara

main harif-e-kashmakash hun hai jagah meri talatum

jise maut ki ho KHwahish wahi DhunD le kinara

tere puchhne ke sadqe gham-e-dil ka majra kya

tere lutf ne jalaya teri be-ruKHi ne mara

meri aarzu aur un ko kahin KHwab to nahin hai

ye kahan chamak raha hai mere baKHt ka sitara

hai ajib chiz 'sahir' ye muqaddar-e-wafa bhi

ki usi ko hum ne chaha jo na ho sake hamara