hai ajib rishta-e-gum-shuda ki jise khanDar ne bhula diya

hai ajiib rishta-e-gum-shuda ki jise khañDar ne bhulā diyā

kahīñ zindagī huī ḳhema-zan kahīñ bām-o-dar ne bhulā diyā

kise bhūlnā thā nasīb meñ kise bhūlne kā thā faisla

kise yaad rakhnā thā umr bhar kise chashm-e-tar ne bhulā diyā

vo jo be-nishān se log the vahī manziloñ kā nishāñ hue

jise rahguzar kī ḳhabar huī use rahguzar ne bhulā diyā

vo zarūratoñ kā malāl thā to ye hijratoñ kā savāl hai

vo jo apnī miTTī se kaT ga.e unheñ kis safar ne bhulā diyā

thī jo aag dil meñ lagī huī vo bhī rafta rafta dhuāñ huī

thā jo lams māzī-o-hāl kā use fitna-gar ne bhulā diyā

jo raqam huī sar-e-dāstāñ pas-e-dāstāñ bhī nahīñ huī

thā jo ramz harf-e-kamāl kā vo fasāna-gar ne bhulā diyā

hai ajib rishta-e-gum-shuda ki jise khanDar ne bhula diya

kahin zindagi hui KHema-zan kahin baam-o-dar ne bhula diya

kise bhulna tha nasib mein kise bhulne ka tha faisla

kise yaad rakhna tha umr bhar kise chashm-e-tar ne bhula diya

wo jo be-nishan se log the wahi manzilon ka nishan hue

jise rahguzar ki KHabar hui use rahguzar ne bhula diya

wo zaruraton ka malal tha to ye hijraton ka sawal hai

wo jo apni miTTi se kaT gae unhen kis safar ne bhula diya

thi jo aag dil mein lagi hui wo bhi rafta rafta dhuan hui

tha jo lams mazi-o-haal ka use fitna-gar ne bhula diya

jo raqam hui sar-e-dastan pas-e-dastan bhi nahin hui

tha jo ramz harf-e-kamal ka wo fasana-gar ne bhula diya