hai bais-e-sukun suKHan-war tumhaara nam

hai bā.is-e-sukūn suḳhan-var tumhārā naam

letā hai is liye vo barābar tumhārā naam

mujh ko yaqīñ hai tum bhī bahut muztarib rahe

jab bhī liyā hai maiñ ne taḌap kar tumhārā naam

uThtā hai jab tabāhī-e-dil kā kabhī savāl

aa aa ke Thahar jaatā hai lab par tumhārā naam

mere tamām sheroñ meñ ik jaañ sī paḌ ga.ī

likkhī ġhazal jo zehn meñ rakh kar tumhārā naam

kaise miTā.e mauj-e-havādis tumhī kaho

hai naqsh zehn-o-dil pe gul-e-tar tumhārā naam

tahzīb ke ḳhilāf hai iz.hār-e-āshiqī

aatā nahīñ hai is liye lab par tumhārā naam

ye sirf vālihāna mohabbat kī baat hai

merī suḳhan-varī kā hai mehvar tumhārā naam

had-darja jāñ-gudāz haiñ yādoñ ke silsile

kaise 'sahar' bhulā.egā dilbar tumhārā naam

hai bais-e-sukun suKHan-war tumhaara nam

leta hai is liye wo barabar tumhaara nam

mujh ko yaqin hai tum bhi bahut muztarib rahe

jab bhi liya hai main ne taDap kar tumhaara nam

uThta hai jab tabahi-e-dil ka kabhi sawal

aa aa ke Thahar jata hai lab par tumhaara nam

mere tamam sheron mein ek jaan si paD gai

likkhi ghazal jo zehn mein rakh kar tumhaara nam

kaise miTae mauj-e-hawadis tumhi kaho

hai naqsh zehn-o-dil pe gul-e-tar tumhaara nam

tahzib ke KHilaf hai izhaar-e-ashiqi

aata nahin hai is liye lab par tumhaara nam

ye sirf walihana mohabbat ki baat hai

meri suKHan-wari ka hai mehwar tumhaara nam

had-darja jaan-gudaz hain yaadon ke silsile

kaise 'sahar' bhulaega dilbar tumhaara nam