hai barq-e-KHirman-e-jaan soz-e-nihan hamara

hai barq-e-ḳhirman-e-jāñ soz-e-nihāñ hamārā

sargarm-e-jalva-e-ġham husn-e-bayāñ hamārā

rang-e-bahār-āgīñ mazmūn se hai paidā

ye sher kī zamīñ hai yā bostāñ hamārā

ho naqsh-e-ārzū bhī ik sūrat-e-nigārīñ

gar ho musavvir-e-chīñ daur-e-zamāñ hamārā

kyā harf-e-mudda.ā hai ik nashtar-e-rag-e-jāñ

kyoñ sarf-e-ġham hai naqd-e-umr-e-ravāñ hamārā

āġhosh-e-zulm hī meñ parvarda ho chuke haiñ

kyā imtihāñ karegā ye āsmāñ hamārā

sabr-o-qarār dil meñ kis tarah raah paa.eñ

ye nāla-e-shab-e-ġham hai pāsbāñ hamārā

dil-dād-gān-e-ġham ko ishrat se kyā ta.alluq

hai kūcha-e-musībat dārul-jināñ hamārā

ḳhamyāza-e-tamanna hai maujib-e-tabāhī

hai kaun jo uThā.e bār-e-garāñ hamārā

ai baḳht-e-vāzhgūñ ham tujh se ye pūchhte haiñ

kyā ham ko kuchh na degā rozī-rasāñ hamārā

jaur-e-falak kā 'maz.har' parda uThā hī dete

hai sadd-e-rāh lekin zabt-e-fuġhāñ hamārā

hai barq-e-KHirman-e-jaan soz-e-nihan hamara

sargarm-e-jalwa-e-gham husn-e-bayan hamara

rang-e-bahaar-agin mazmun se hai paida

ye sher ki zamin hai ya bostan hamara

ho naqsh-e-arzu bhi ek surat-e-nigarin

gar ho musawwir-e-chin daur-e-zaman hamara

kya harf-e-muddaa hai ek nashtar-e-rag-e-jaan

kyon sarf-e-gham hai naqd-e-umr-e-rawan hamara

aaghosh-e-zulm hi mein parwarda ho chuke hain

kya imtihan karega ye aasman hamara

sabr-o-qarar dil mein kis tarah rah paen

ye nala-e-shab-e-gham hai pasban hamara

dil-dad-gan-e-gham ko ishrat se kya talluq

hai kucha-e-musibat darul-jinan hamara

KHamyaza-e-tamanna hai maujib-e-tabahi

hai kaun jo uThae bar-e-garan hamara

ai baKHt-e-wazhgun hum tujh se ye puchhte hain

kya hum ko kuchh na dega rozi-rasan hamara

jaur-e-falak ka 'mazhar' parda uTha hi dete

hai sadd-e-rah lekin zabt-e-fughan hamara