hai bhare daraKHton ke bawajud ban tanha

hai bhare daraḳhtoñ ke bāvajūd ban tanhā

roz-o-shab ke hañgāme phir bhī anjuman tanhā

ratjagoñ ke vo sāthī kis jahāñ meñ baste haiñ

kyā hamīñ tak aa.egī sub.h kī kiran tanhā

zulf kī hasīñ rāteñ kis pe saya-afgan haiñ

mere ghar tak aa.ī hai bū-e-yāsaman tanhā

terī yaad ne uTh kar mujh se kal ye pūchhā thā

apne ġham ke sahrā meñ jā sakoge tan-tanhā

kuchh kamī na thī dil kī kūcha-e-mohabbat meñ

ek ham hī aa.e the le ke jān-o-tan tanhā

haa.e ye shab-e-vā'da dil kā haal kyā kahiye

hajla-e-urūsī meñ jis tarah dulhan tanhā

thī ḳhudā kī shirkat bhī varna bojh nafrat kā

kis tarah uThā paa.e shaiḳh-o-barhaman tanhā

hai bhare daraKHton ke bawajud ban tanha

roz-o-shab ke hangame phir bhi anjuman tanha

ratjagon ke wo sathi kis jahan mein baste hain

kya hamin tak aaegi subh ki kiran tanha

zulf ki hasin raaten kis pe saya-afgan hain

mere ghar tak aai hai bu-e-yasaman tanha

teri yaad ne uTh kar mujh se kal ye puchha tha

apne gham ke sahra mein ja sakoge tan-tanha

kuchh kami na thi dil ki kucha-e-mohabbat mein

ek hum hi aae the le ke jaan-o-tan tanha

hae ye shab-e-wa'da dil ka haal kya kahiye

hajla-e-urusi mein jis tarah dulhan tanha

thi KHuda ki shirkat bhi warna bojh nafrat ka

kis tarah uTha pae shaiKH-o-barhaman tanha