hai chand jalwa-fagan auj par sitara hai

hai chāñd jalva-fagan auj par sitārā hai

bahār-e-sabza-e-parcham se āshkāra hai

hamīñ ne ḳhuun se sīñchā hai bārhā apne

ye gul hamāre haiñ ye gulsitāñ hamārā hai

bulandiyoñ se pahuñchne lage salām niyāz

adā-e-nāz se pastī ne sar ubhārā hai

uTho uTho ki jigar shaq huā añdheroñ kā

ufuq se sub.h kī tahrīr āshkāra hai

chalo chalo ki rāh-e-irtiqā hai chashm-ba-rāh

baḌho baḌho ki surayyā pe haq tumhārā hai

nasīb-e-qaum meñ kyā rah ga.ī kamī baaqī

zamīn sabz hai ik chāñd hai sitārā hai

utar ke aa gayā jaise zamīñ pe bāġh-e-iram

ravish-ravish ko bahāroñ ne yuuñ sañvārā hai

jo arz-e-pāk pe hai rang-o-nūr kī bārish

ye mālik-e-do-jahāñ kā hasīñ ishārā hai

kisī ko rāhat-o-taskīn-e-dil mile jis se

'sirāj' aisī aziyyat hameñ gavārā hai

hai chand jalwa-fagan auj par sitara hai

bahaar-e-sabza-e-parcham se aashkara hai

hamin ne KHun se sincha hai barha apne

ye gul hamare hain ye gulsitan hamara hai

bulandiyon se pahunchne lage salam niyaz

ada-e-naz se pasti ne sar ubhaara hai

uTho uTho ki jigar shaq hua andheron ka

ufuq se subh ki tahrir aashkara hai

chalo chalo ki rah-e-irtiqa hai chashm-ba-rah

baDho baDho ki surayya pe haq tumhaara hai

nasib-e-qaum mein kya rah gai kami baqi

zamin sabz hai ek chand hai sitara hai

utar ke aa gaya jaise zamin pe bagh-e-iram

rawish-rawish ko bahaaron ne yun sanwara hai

jo arz-e-pak pe hai rang-o-nur ki barish

ye malik-e-do-jahan ka hasin ishaara hai

kisi ko rahat-o-taskin-e-dil mile jis se

'siraj' aisi aziyyat hamein gawara hai