hai dhakela pahle apne se sitamgar ki taraf

hai dhakelā pahle apne se sitamgar kī taraf

lā rahe haiñ ab vo ḳhanjar ko mire sar kī taraf

apnī marzī se hue the nā-muqaddar kī taraf

dasht-zād ab dauḌte haiñ kyoñ samundar kī taraf

chand lamhe vo zarā ġhā.eb huā manzar se aur

aañkh uTThī hī nahīñ dobāra manzar kī taraf

apne andar jhāñknā āsān ho jaatā agar

aañkh jo bāhar khulī hai khultī andar kī taraf

is gumāñ meñ hī bhañvar kī zad se maiñ niklā nahīñ

tū bachāne aa.egā jaise samundar kī taraf

us ke dil se maiñ nikal kar aise aaya tujh talak

koī be-ghar jaise jaatā hai kisī ghar kī taraf

mubtalā huuñ āj-kal maiñ aisī tanhā.ī meñ dost

raat bhar huuñ dekhtā dīvār aur dar kī taraf

dil se tere jaane kā khaTkā nahīñ jaatā hai aur

merā dhyān ab jaatā rahtā hai isī Dar kī taraf

ye bhī mumkin hai dobāra hāthoñ meñ na aa.uuñ maiñ

tum ḳhudārā mat uchhālo mujh ko uupar kī taraf

haath meñ ḳhanjar liye kahte haiñ shoḳhī se mujhe

apnā sar chup-chāp le kar aa jā ḳhanjar kī taraf

kā.enāt aisā hai vo aur huuñ zamīñ ke jaisā maiñ

khīñchtā hai vo mujhe 'kaunain' mehvar kī taraf

hai dhakela pahle apne se sitamgar ki taraf

la rahe hain ab wo KHanjar ko mere sar ki taraf

apni marzi se hue the na-muqaddar ki taraf

dasht-zad ab dauDte hain kyon samundar ki taraf

chand lamhe wo zara ghaeb hua manzar se aur

aankh uTThi hi nahin dobara manzar ki taraf

apne andar jhankna aasan ho jata agar

aankh jo bahar khuli hai khulti andar ki taraf

is guman mein hi bhanwar ki zad se main nikla nahin

tu bachane aaega jaise samundar ki taraf

us ke dil se main nikal kar aise aaya tujh talak

koi be-ghar jaise jata hai kisi ghar ki taraf

mubtala hun aaj-kal main aisi tanhai mein dost

raat bhar hun dekhta diwar aur dar ki taraf

dil se tere jaane ka khaTka nahin jata hai aur

mera dhyan ab jata rahta hai isi Dar ki taraf

ye bhi mumkin hai dobara hathon mein na aaun main

tum KHudara mat uchhaalo mujh ko upar ki taraf

hath mein KHanjar liye kahte hain shoKHi se mujhe

apna sar chup-chap le kar aa ja KHanjar ki taraf

kaenat aisa hai wo aur hun zamin ke jaisa main

khinchta hai wo mujhe 'kaunain' mehwar ki taraf