hai dil aaina-saman parda-e-hail se kya matlab

hai dil ā.īna-sāmāñ parda-e-hā.il se kyā matlab

tirā dīdār āsāñ hai kisī mushkil se kyā matlab

jo bahr-e-ishq meñ Duubā use sāhil se kyā matlab

mohabbat dil kī ḳhidmat hai use hāsil se kyā matlab

sukūñ hai maut harakat zindagī kā naam hai hamdam

yahāñ raftār hī raftār hai manzil se kyā matlab

jo ho barbād-e-ulfat kyoñ kisī kā aasrā DhūñDe

Dubone laa.e jo kashtī use sāhil se kyā matlab

agar tum saath ho vīrāna bhī gulshan se baḌh kar ho

na jis mahfil meñ ho tum mujh ko us mahfil se kyā matlab

hai chalnā raah par terī tajassus meñ huuñ sargardāñ

mile terā nishān-e-pā mujhe manzil se kyā matlab

nigāh-e-nāz ke nāvak chalā.e jā chalā.e jā

balā se koī ghāyal ho tujhe ghā.il se kyā matlab

'fazā' ko hai tamanna tere dar pe jab.ha-sā.ī kī

na ho jo āstāñ terā to is manzil se kyā matlab

hai dil aaina-saman parda-e-hail se kya matlab

tera didar aasan hai kisi mushkil se kya matlab

jo bahr-e-ishq mein Duba use sahil se kya matlab

mohabbat dil ki KHidmat hai use hasil se kya matlab

sukun hai maut harakat zindagi ka nam hai hamdam

yahan raftar hi raftar hai manzil se kya matlab

jo ho barbaad-e-ulfat kyon kisi ka aasra DhunDe

Dubone lae jo kashti use sahil se kya matlab

agar tum sath ho virana bhi gulshan se baDh kar ho

na jis mahfil mein ho tum mujh ko us mahfil se kya matlab

hai chalna rah par teri tajassus mein hun sargardan

mile tera nishan-e-pa mujhe manzil se kya matlab

nigah-e-naz ke nawak chalae ja chalae ja

bala se koi ghayal ho tujhe ghail se kya matlab

'faza' ko hai tamanna tere dar pe jabha-sai ki

na ho jo aastan tera to is manzil se kya matlab