hai ghazal se tujhko shaghaf agar sabhi masalon ko suKHan bana

hai ġhazal se tujh ko shaġhaf agar sabhī mas.aloñ ko suḳhan banā

ġham-e-rozgār kī baat kar tū aziyyatoñ ko suḳhan banā

kabhī mah-ruḳhoñ meñ ulajh gayā kabhī ḳhushbūoñ ke hisār meñ

mire shauq-e-tab.a ne raa.e dī tū na gesūoñ ko suḳhan banā

ka.ī zāviye haiñ savāl ke yahī ġhaur karnā hai ab tujhe

jahāñ mas.aloñ ke bhī hal mileñ unhīñ pahluoñ ko suḳhan banā

tirā shor-ġhul vo suneñge kyoñ jo alam liye haiñ sukūn ke

tujhe un se karnī ho guftugū to ḳhamoshiyoñ ko suḳhan banā

kisī jāñ-ba-lab kī bhī aah sun jo taḌap ke tujh ko pukār le

kabhī dard-e-dil se ḳhitāb kar kabhī āñsuoñ ko suḳhan banā

koī teġh-o-nezā uThā.e jab tū qalam se us ko javāb de

tū rafāqatoñ kī zabān rakh tū sadāqatoñ ko suḳhan banā

ye hai rāz-e-azmat-e-shā.erī tū samajh le 'aḳhtar-e-hāshmī'

ye jo lafz lafz haiñ vus'ateñ inhīñ vus'atoñ ko suḳhan banā

hai ghazal se tujh ko shaghaf agar sabhi masalon ko suKHan bana

gham-e-rozgar ki baat kar tu aziyyaton ko suKHan bana

kabhi mah-ruKHon mein ulajh gaya kabhi KHushbuon ke hisar mein

mere shauq-e-taba ne rae di tu na gesuon ko suKHan bana

kai zawiye hain sawal ke yahi ghaur karna hai ab tujhe

jahan masalon ke bhi hal milen unhin pahluon ko suKHan bana

tera shor-ghul wo sunenge kyon jo alam liye hain sukun ke

tujhe un se karni ho guftugu to KHamoshiyon ko suKHan bana

kisi jaan-ba-lab ki bhi aah sun jo taDap ke tujh ko pukar le

kabhi dard-e-dil se KHitab kar kabhi aansuon ko suKHan bana

koi tegh-o-neza uThae jab tu qalam se us ko jawab de

tu rafaqaton ki zaban rakh tu sadaqaton ko suKHan bana

ye hai raaz-e-azmat-e-shaeri tu samajh le 'aKHtar-e-hashmi'

ye jo lafz lafz hain wus'aten inhin wus'aton ko suKHan bana