hai guzar arsh-e-barin tak nala-e-shab-gir ka

hai guzar arsh-e-barīñ tak nāla-e-shab-gīr kā

dekhiye to silsila TuuTī huī zanjīr kā

bār-e-sar se mujh ko ai qātil subuk-doshī huī

hai mirī gardan pe ye ehsāñ tirī shamshīr kā

dekh kar un ko mujhe sakta hai vo ḳhāmosh haiñ

sāmnā hai aaj ik tasvīr se tasvīr kā

saath meñ us ke nikal aayā hai kyā merā jigar

dekhte haiñ kis liye paikāñ vo apne tiir kā

kī butoñ ke dar pe maiñ ne jubba-sā.ī umr-bhar

par miTā ab tak na vo likkhā huā taqdīr kā

naqsh se bahzād bhī hairāñ hai misl-e-ā.ina

ai parī-paikar vo aalam hai tirī tasvīr kā

ġhair ke pahlū meñ ai 'sho.ala' nahīñ un ko qarār

hai asar itnā hamārī āh-e-pur-tāsīr kā

hai guzar arsh-e-barin tak nala-e-shab-gir ka

dekhiye to silsila TuTi hui zanjir ka

bar-e-sar se mujh ko ai qatil subuk-doshi hui

hai meri gardan pe ye ehsan teri shamshir ka

dekh kar un ko mujhe sakta hai wo KHamosh hain

samna hai aaj ek taswir se taswir ka

sath mein us ke nikal aaya hai kya mera jigar

dekhte hain kis liye paikan wo apne tir ka

ki buton ke dar pe main ne jubba-sai umr-bhar

par miTa ab tak na wo likkha hua taqdir ka

naqsh se bahzad bhi hairan hai misl-e-aina

ai pari-paikar wo aalam hai teri taswir ka

ghair ke pahlu mein ai 'shoala' nahin un ko qarar

hai asar itna hamari aah-e-pur-tasir ka