hai hamari ruh shabnam ru-e-dilbar aaftab

hai hamārī ruuh shabnam rū-e-dilbar āftāb

khīñch legā is ko jab niklā chamak kar āftāb

aap kā naqsh-e-kaf-e-pā kar na de mahshar bapā

is ko dekhā aur utar aaya zamīn par āftāb

hai kisī parda-nashīñ kī be-shak is ko justujū

kuchh to baa.is hai jo yuuñ phirtā hai ghar ghar āftāb

jalva-gāh-e-yār kā aalam nazar aaya kuchh aur

kho gayā hai mil ke zarroñ meñ yahāñ par āftāb

merā dāġh-e-hijr bhī to hogā āḳhir mere saath

dekhnā hai hashr meñ niklegā kyūñkar āftāb

naqsh-e-pā ne aap ke donoñ ko be-ḳhud kar diyā

māh-e-nau gardish meñ hai khātā hai chakkar āftāb

ye tirī ḳhāk-e-qadam kā zarra hai ma.alūm hai

ho gayā charḳh-e-chahārum par pahuñch kar āftāb

āsmāñ ke sabz parde meñ koī māshūq hai

sar kā zevar chāñd hai gardan kā zevar āftāb

husn kī garmī baḌhī ruḳh par javānī kī hai dhuup

din chaḌhā aane lagā hai muñh ke uupar āftāb

ye hai shān-e-bū-turābī ye hai faiz-e-lam-yazal

kar diyā hai jis ne har zarre ko 'akbar' āftāb

hai hamari ruh shabnam ru-e-dilbar aaftab

khinch lega is ko jab nikla chamak kar aaftab

aap ka naqsh-e-kaf-e-pa kar na de mahshar bapa

is ko dekha aur utar aaya zamin par aaftab

hai kisi parda-nashin ki be-shak is ko justuju

kuchh to bais hai jo yun phirta hai ghar ghar aaftab

jalwa-gah-e-yar ka aalam nazar aaya kuchh aur

kho gaya hai mil ke zarron mein yahan par aaftab

mera dagh-e-hijr bhi to hoga aaKHir mere sath

dekhna hai hashr mein niklega kyunkar aaftab

naqsh-e-pa ne aap ke donon ko be-KHud kar diya

mah-e-nau gardish mein hai khata hai chakkar aaftab

ye teri KHak-e-qadam ka zarra hai malum hai

ho gaya charKH-e-chahaarum par pahunch kar aaftab

aasman ke sabz parde mein koi mashuq hai

sar ka zewar chand hai gardan ka zewar aaftab

husn ki garmi baDhi ruKH par jawani ki hai dhup

din chaDha aane laga hai munh ke upar aaftab

ye hai shan-e-bu-turabi ye hai faiz-e-lam-yazal

kar diya hai jis ne har zarre ko 'akbar' aaftab