hai hukm ki ho din bhi to hum raat samajh len

hai hukm ki ho din bhī to ham raat samajh leñ

achchhā hai ki is baat ko ham baat samajh leñ

sunte haiñ ki hai gardish-e-ayyām baḌī chiiz

mohlat hameñ mil jaa.e to auqāt samajh leñ

apnā sā kalejā hai kisī kā ki bhare khet

patthar bhī baras jaa.eñ to barsāt samajh leñ

haiñ ġhair ki amrit pe bhī nā-ḳhush haiñ udhar ham

tum zahr bhī bhijvāo to sauġhāt samajh leñ

is tarah phañse haiñ ki samajh buujh hai nālāñ

fursat hameñ mil jaa.e to hālāt samajh leñ

kar de jo ishāra nigah-e-nāz to 'kundan'

jiitī huī baazī ko bhī ham maat samajh leñ

hai hukm ki ho din bhi to hum raat samajh len

achchha hai ki is baat ko hum baat samajh len

sunte hain ki hai gardish-e-ayyam baDi chiz

mohlat hamein mil jae to auqat samajh len

apna sa kaleja hai kisi ka ki bhare khet

patthar bhi baras jaen to barsat samajh len

hain ghair ki amrit pe bhi na-KHush hain udhar hum

tum zahr bhi bhijwao to saughat samajh len

is tarah phanse hain ki samajh bujh hai nalan

fursat hamein mil jae to haalat samajh len

kar de jo ishaara nigah-e-naz to 'kundan'

jiti hui bazi ko bhi hum mat samajh len