hai ishq to phir jaan se guzar kyon nahin jate

hai 'ishq to phir jaañ se guzar kyoñ nahīñ jaate

qātil ise kahte ho to mar kyoñ nahīñ jaate

iifā kā agar dil meñ irāda hī nahīñ hai

vā'de se phir ai dost mukar kyoñ nahīñ jaate

duniyā meñ hasīñ aur manāzir bhī bahut haiñ

tum kūcha-e-jānāñ se guzar kyoñ nahīñ jaate

qātil tumheñ ab dekh ke ghabrāne lage haiñ

maqtal meñ ba-andāz-e-digar kyoñ nahīñ jaate

sunte the ki aa.egā kabhī vasl kā mausam

phir hijr ke ye shām-o-sahar kyoñ nahīñ jaate

jazba hai agar dil meñ to phir raushnī ban kar

tārīk fazāoñ meñ bikhar kyoñ nahīñ jaate

sayyād se gar ahl-e-chaman itne ḳhafā haiñ

is baar koī faisla kar kyoñ nahīñ jaate

hai 'ishq to phir jaan se guzar kyon nahin jate

qatil ise kahte ho to mar kyon nahin jate

ifa ka agar dil mein irada hi nahin hai

wa'de se phir ai dost mukar kyon nahin jate

duniya mein hasin aur manazir bhi bahut hain

tum kucha-e-jaanan se guzar kyon nahin jate

qatil tumhein ab dekh ke ghabrane lage hain

maqtal mein ba-andaz-e-digar kyon nahin jate

sunte the ki aaega kabhi wasl ka mausam

phir hijr ke ye sham-o-sahar kyon nahin jate

jazba hai agar dil mein to phir raushni ban kar

tarik fazaon mein bikhar kyon nahin jate

sayyaad se gar ahl-e-chaman itne KHafa hain

is bar koi faisla kar kyon nahin jate