hai iztirab dil mein to dil iztirab mein

hai iztirāb dil meñ to dil iztirāb meñ

Daalā hai tum ne mujh ko ajab pech-o-tāb meñ

DhūñDeñge ek din mujhe ḳhud jalva-hā-e-husn

dekhūñgā maiñ raheñge vo kab tak hijāb meñ

ik husn-e-barq-pāsh kī din raat hai talāsh

apnī qazā ko DhūñD rahā huuñ shabāb meñ

ham ne junūñ ko aql kahā aql ko junūñ

kyā nukta-ras thā ishq hamārā shabāb meñ

ajzā yahī haiñ nusḳha-e-āb-e-hayāt ke

kuchh mastī-e-nigāh milā do sharāb meñ

phir ho rahī hai pursish-e-āmāl roz-e-hashr

yārab sazā-e-maut ga.ī kis hisāb meñ

gesū darāz mast nazar chehra āftāb

ab kuchh kamī nahīñ hai tumhāre shabāb meñ

ḳhat meñ kharī kharī bhī sunā.ī haiñ kuchh unheñ

matlab ye hai kareñ na tavaqquf javāb meñ

duniyā-e-aql-o-hosh meñ 'sāhir' kise nasīb

vo kaif-e-be-ḳhudī jo hai bazm-e-sharāb meñ

hai iztirab dil mein to dil iztirab mein

Dala hai tum ne mujh ko ajab pech-o-tab mein

DhunDenge ek din mujhe KHud jalwa-ha-e-husn

dekhunga main rahenge wo kab tak hijab mein

ek husn-e-barq-pash ki din raat hai talash

apni qaza ko DhunD raha hun shabab mein

hum ne junun ko aql kaha aql ko junun

kya nukta-ras tha ishq hamara shabab mein

ajza yahi hain nusKHa-e-ab-e-hayat ke

kuchh masti-e-nigah mila do sharab mein

phir ho rahi hai pursish-e-amal roz-e-hashr

yarab saza-e-maut gai kis hisab mein

gesu daraaz mast nazar chehra aaftab

ab kuchh kami nahin hai tumhaare shabab mein

KHat mein khari khari bhi sunai hain kuchh unhen

matlab ye hai karen na tawaqquf jawab mein

duniya-e-aql-o-hosh mein 'sahir' kise nasib

wo kaif-e-be-KHudi jo hai bazm-e-sharab mein