hai jurm mohabbat to saza kyun nahin dete

hai jurm mohabbat to sazā kyuuñ nahīñ dete

yaaro hameñ ik roz miTā kyuuñ nahīñ dete

ham raah meñ dīvār kī mānind khaḌe haiñ

dīvār ko Thokar se girā kyuuñ nahīñ dete

maiḳhāne ke ādāb se vāqif jo nahīñ ham

mahfil se hameñ apnī uThā kyuuñ nahīñ dete

jab ham ne lagāyā thā gale se tumheñ apne

us daur kī tārīḳh bhulā kyuuñ nahīñ dete

mash.hūr-e-zamāna jo hai sachchā.ī hamārī

phir tum hameñ suulī pe chaḌhā kyuuñ nahīñ dete

ai rāhbaro ka.aba-o-kāshī ko milā kar

maiḳhāne kī ik raah banā kyuuñ nahīñ dete

jin logoñ ko da.avā hai masīhā.ī kā 'sājid'

vo log hameñ zahr pilā kyuuñ nahīñ dete

hai jurm mohabbat to saza kyun nahin dete

yaro hamein ek roz miTa kyun nahin dete

hum rah mein diwar ki manind khaDe hain

diwar ko Thokar se gira kyun nahin dete

maiKHane ke aadab se waqif jo nahin hum

mahfil se hamein apni uTha kyun nahin dete

jab hum ne lagaya tha gale se tumhein apne

us daur ki tariKH bhula kyun nahin dete

mashhur-e-zamana jo hai sachchai hamari

phir tum hamein suli pe chaDha kyun nahin dete

ai rahbaro kaba-o-kashi ko mila kar

maiKHane ki ek rah bana kyun nahin dete

jin logon ko dawa hai masihai ka 'sajid'

wo log hamein zahr pila kyun nahin dete