hai kaun moatabar karun kis par yaqin main

hai kaun mo'atabar karūñ kis par yaqīn maiñ

ġhāsib bane vahī jinheñ samjhā amiin maiñ

ḳhanjar chhupā ke laa.e the jo āstīn meñ

samjhā kiye thā un ko jahāñ kā amiin maiñ

na ilm hai na fan na mata-e-hunar koī

is par ye sochnā rahūñ masnad-nashīn maiñ

nāchīz-o-kam-savād jab izzat-ma.āb hoñ

lafzoñ pe kaise phir karūñ āḳhir yaqīn maiñ

dekhā jo hans ko to huā hai bahut malūl

kavvā samajh rahā thā huuñ sab se hasīn maiñ

kyūñkar na rūh-e-'mīr' bhalā mutma.in rahe

fan kī rivāyatoñ kā huuñ dekho amiin maiñ

us par mirī hayāt kā dār-o-madār hai

vo abr-e-āb-dār hai pyāsī zamīn maiñ

haiñ roz-o-shab hayāt ke yaksāniyat bhare

'jāved' ban ke rah gayā zinda machine maiñ

hai kaun mo'atabar karun kis par yaqin main

ghasib bane wahi jinhen samjha amin main

KHanjar chhupa ke lae the jo aastin mein

samjha kiye tha un ko jahan ka amin main

na ilm hai na fan na mata-e-hunar koi

is par ye sochna rahun masnad-nashin main

nachiz-o-kam-sawad jab izzat-maab hon

lafzon pe kaise phir karun aaKHir yaqin main

dekha jo hans ko to hua hai bahut malul

kawwa samajh raha tha hun sab se hasin main

kyunkar na ruh-e-'mir' bhala mutmain rahe

fan ki riwayaton ka hun dekho amin main

us par meri hayat ka dar-o-madar hai

wo abr-e-ab-dar hai pyasi zamin main

hain roz-o-shab hayat ke yaksaniyat bhare

'jawed' ban ke rah gaya zinda machine main