hai kya kyon aur kaise chhoD de in sab sawalon ko

hai kyā kyoñ aur kaise chhoḌ de in sab savāloñ ko

sañbhal jā aql dil ab jāntā hai terī chāloñ ko

aqīdat meñ haqīqat gum huī aisī ki ab aksar

mujassam dekhte haiñ ham ḳhud apne hī ḳhayāloñ ko

zabāñ-bandī kā mausam hai chaman meñ kyā kareñ jā kar

har ik bulbul se kahnā rok rakkhe apne nāloñ ko

aqīdat fikr ko taqlīd par majbūr kartī hai

muqallid dil banā detā hai kitne aql vāloñ ko

bachegā kyā hamāre paas apnī zindagānī se

agar tafrīq kar deñ ham tumhāre chand sāloñ ko

na darvāza khulā us kā na hī aaya gayā koī

tumhāre baad bas ab dekhte haiñ dil ke jāloñ ko

koī rauzan koī khiḌkī koī rasta kahīñ par ho

añdhere DhūñDte haiñ har taraf din ke ujāloñ ko

paḌe haiñ aql pe jo har aqīdat-mañd sālik kī

na jaane kaise khologe 'hidāyat' aise tāloñ ko

hai kya kyon aur kaise chhoD de in sab sawalon ko

sanbhal ja aql dil ab jaanta hai teri chaalon ko

aqidat mein haqiqat gum hui aisi ki ab aksar

mujassam dekhte hain hum KHud apne hi KHayalon ko

zaban-bandi ka mausam hai chaman mein kya karen ja kar

har ek bulbul se kahna rok rakkhe apne nalon ko

aqidat fikr ko taqlid par majbur karti hai

muqallid dil bana deta hai kitne aql walon ko

bachega kya hamare pas apni zindagani se

agar tafriq kar den hum tumhaare chand salon ko

na darwaza khula us ka na hi aaya gaya koi

tumhaare baad bas ab dekhte hain dil ke jalon ko

koi rauzan koi khiDki koi rasta kahin par ho

andhere DhunDte hain har taraf din ke ujalon ko

paDe hain aql pe jo har aqidat-mand salik ki

na jaane kaise khologe 'hidayat' aise talon ko