hai madrasa yahi to yahi KHanqah hai

hai madrasa yahī to yahī ḳhānqāh hai

insāñ kā dil hī ek baḌī dars-gāh hai

rusvā na kar de mujh ko ye andāz-e-ḳhāmushī

un ke sivā har ek kī mujh par nigāh hai

sharmā.e bhī vo apne sitam par to kyā huā

sharm-o-hayā se ham pe kab un kī nigāh hai

jo pyaar kī nahīñ na sahī qahr kī sahī

chāra mire maraz kā tirī ik nigāh hai

us ne naqāb chehre se ulTā to hai magar

yārā-e-dīd kis ko ki haa.il nigāh hai

kuchh munhasir guloñ pe nahīñ chashm-e-shauq meñ

har zarra gulsitāñ kā tirī jalva-gāh hai

isyāñ ba-qadr-e-shān-e-karīmī nahīñ mire

koī gunāh hai to yahī ik gunāh hai

goyā kisī ke ishq meñ ham nīm-jāñ na the

kyā aa.e vo ki ab na fuġhāñ hai na aah hai

hai pesh-ḳhema ranjish-e-umr-e-darāz kā

un se jo ye ghaḌī-do-ghaḌī kā nibāh hai

kyoñ ho gayā na dekhte hī maiñ shahīd-e-husn

har baar un ko dekhūñ ye ijz-e-nigāh hai

us be-hunar ko bhaa.e kisī kā kamāl kyā

'sā.ib' faqat uyuub pe jis kī nigāh hai

hai madrasa yahi to yahi KHanqah hai

insan ka dil hi ek baDi dars-gah hai

ruswa na kar de mujh ko ye andaz-e-KHamushi

un ke siwa har ek ki mujh par nigah hai

sharmae bhi wo apne sitam par to kya hua

sharm-o-haya se hum pe kab un ki nigah hai

jo pyar ki nahin na sahi qahr ki sahi

chaara mere maraz ka teri ek nigah hai

us ne naqab chehre se ulTa to hai magar

yara-e-did kis ko ki hail nigah hai

kuchh munhasir gulon pe nahin chashm-e-shauq mein

har zarra gulsitan ka teri jalwa-gah hai

isyan ba-qadr-e-shan-e-karimi nahin mere

koi gunah hai to yahi ek gunah hai

goya kisi ke ishq mein hum nim-jaan na the

kya aae wo ki ab na fughan hai na aah hai

hai pesh-KHema ranjish-e-umr-e-daraaz ka

un se jo ye ghaDi-do-ghaDi ka nibah hai

kyon ho gaya na dekhte hi main shahid-e-husn

har bar un ko dekhun ye ijz-e-nigah hai

us be-hunar ko bhae kisi ka kamal kya

'saib' faqat uyub pe jis ki nigah hai