hai masiha-e-ajal ko tere bimar se naz

hai masīhā-e-ajal ko tire bīmār se naaz

kis ko duniyā meñ nahīñ apne talabgār se naaz

nāz-bardārī-e-ranjūr-e-abad mushkil hai

uTh sakeñge mire kab tak kisī ġham-ḳhvār se naaz

ban gayā yaar kī tasvīr har ik naqsh-e-qadam

kyā Tapaktā hai parī-vash tirī raftār se naaz

kyoñ na ushshāq ko phir lutf-o-karam ho yaksāñ

naaz se pyaar hai ḳhush-tar tirā aur pyaar se naaz

lan-tarānī kī sadā koh par ab tak hai buland

in butoñ ko hai nahīñ tālib-e-dīdār se naaz

ab tire nāz-e-bajā ko bhī vo samjhā bejā

ḳhat numāyāñ hai munāsib nahīñ aġhyār se naaz

kyoñ na jī bech ke ḳhvāhān 'shahīdī' hoñ hazār

un kā ek ek hai anmol ḳharīdār se naaz

hai masiha-e-ajal ko tere bimar se naz

kis ko duniya mein nahin apne talabgar se naz

naz-bardari-e-ranjur-e-abad mushkil hai

uTh sakenge mere kab tak kisi gham-KHwar se naz

ban gaya yar ki taswir har ek naqsh-e-qadam

kya Tapakta hai pari-wash teri raftar se naz

kyon na ushshaq ko phir lutf-o-karam ho yaksan

naz se pyar hai KHush-tar tera aur pyar se naz

lan-tarani ki sada koh par ab tak hai buland

in buton ko hai nahin talib-e-didar se naz

ab tere naz-e-baja ko bhi wo samjha beja

KHat numayan hai munasib nahin aghyar se naz

kyon na ji bech ke KHwahan 'shahidi' hon hazar

un ka ek ek hai anmol KHaridar se naz