hai mujhe pas-e-wafa ai but-e-ayyar faqat

hai mujhe pās-e-vafā ai but-e-ayyār faqat

varna kuchh tū hī nahīñ ek tarah-dār faqat

aarzū is dil-e-shaidā kī yahī hai ki tirā

ek bosa kabhī de de lab-e-sofār faqat

vā'izā ḳhuld ko ham le ke kareñ kyā ham ko

rashk-e-sad-ḳhuld hai vo sāya-e-dīvār faqat

faḳhr samjhe haiñ sab abnā-e-jahāñ dā've ko

hai agar 'aar to ik mujh hī ko hai 'aar faqat

ai gul-andām tire sar kī qasam ġhairoñ kī

ḳhaar hai ek ye nazroñ meñ gunahgār faqat

ai falak aur nahīñ kuchh havas-e-dil un se

hāl-e-dil apnā kiyā chāhūñ huuñ iz.hār faqat

chāragar sūda-e-almās chhiḌak mushk ke saath

dil ke zaḳhmoñ pe na rakh marham-e-zañgār faqat

yuuñ to sab misrī kī Daliyāñ haiñ magar 'aish' sunā

dil-pasand apne haiñ ik 'mīr' ke ash’ār faqat

hai mujhe pas-e-wafa ai but-e-ayyar faqat

warna kuchh tu hi nahin ek tarah-dar faqat

aarzu is dil-e-shaida ki yahi hai ki tera

ek bosa kabhi de de lab-e-sofar faqat

wa'iza KHuld ko hum le ke karen kya hum ko

rashk-e-sad-KHuld hai wo saya-e-diwar faqat

faKHr samjhe hain sab abna-e-jahan da'we ko

hai agar 'ar to ek mujh hi ko hai 'ar faqat

ai gul-andam tere sar ki qasam ghairon ki

KHar hai ek ye nazron mein gunahgar faqat

ai falak aur nahin kuchh hawas-e-dil un se

haal-e-dil apna kiya chahun hun izhaar faqat

chaaragar suda-e-almas chhiDak mushk ke sath

dil ke zaKHmon pe na rakh marham-e-zangar faqat

yun to sab misri ki Daliyan hain magar 'aish' suna

dil-pasand apne hain ek 'mir' ke ash’ar faqat