hai nafas nafas teri aarzu hai qadam qadam teri justuju

hai nafas nafas tirī aarzū hai qadam qadam tirī justujū

maiñ jahāñ rahūñ maiñ kahīñ chalūñ tirī yaad miltī hai kū-ba-kū

hai havā meñ jaise mahak tirī kisī abr meñ hai jhalak terī

mirī shaam ke ye nuqūsh bhī tire jaise lagte haiñ hū-ba-hū

kabhī ashk se mirī aañkh nam kabhī ḳhuuñ se jism ye tar-ba-tar

tire ishq kī ye namāz bhī paḌhūñ kaise dost maiñ be-vuzū

hai badan meñ terī hī āhaTeñ tire naam kī haiñ ye dhaḌkaneñ

mirā dil bhī kaise ye maan le ki chalā gayā kahīñ duur tū

yuuñ laboñ pe mere hañsī bhī hai vahīñ aañkh meñ ye namī bhī hai

maiñ imaam koī huuñ dard kā maiñ huuñ fitratan hī udās-ḳhū

mire lab pe us kā bayān hai mire sheroñ kī vahī jaan hai

jise kah rahe ho ġhazal mirī mire yaar kī hai vo guftugū

hai nafas nafas teri aarzu hai qadam qadam teri justuju

main jahan rahun main kahin chalun teri yaad milti hai ku-ba-ku

hai hawa mein jaise mahak teri kisi abr mein hai jhalak teri

meri sham ke ye nuqush bhi tere jaise lagte hain hu-ba-hu

kabhi ashk se meri aankh nam kabhi KHun se jism ye tar-ba-tar

tere ishq ki ye namaz bhi paDhun kaise dost main be-wuzu

hai badan mein teri hi aahaTen tere nam ki hain ye dhaDkanen

mera dil bhi kaise ye man le ki chala gaya kahin dur tu

yun labon pe mere hansi bhi hai wahin aankh mein ye nami bhi hai

main imam koi hun dard ka main hun fitratan hi udas-KHu

mere lab pe us ka bayan hai mere sheron ki wahi jaan hai

jise kah rahe ho ghazal meri mere yar ki hai wo guftugu