hai raushni mera azm-o-yaqin chala aaya

hai raushnī mirā azm-o-yaqīñ chalā aaya

sitāra huuñ maiñ barā-e-zamīñ chalā aaya

maiñ sab se qīmtī ḳhilqat ḳhudā-e-qudrat kī

mirā javāz hai yūñhī nahīñ chalā aaya

hai merī aah mire qahqahoñ kī aahaT meñ

azā-e-zīst meñ ḳhanda-jabīñ chalā aaya

bisāt-e-dāman-e-sad-chāk terī qismat hai

tire visāl ko aisā nagīñ chalā aaya

ajab ġhazab hai ki dil DhūñDne lagā ḳhud ko

idhar jo aaj vahī dil-nashīñ chalā aaya

zamīñ se dād-rasī kī umiid TuuT chukī

so naala jānib-e-arsh-e-barīñ chalā aaya

ḳhayāl thā ki mire dostoñ kī mahfil hai

so dosto ye huā maiñ yahīñ chalā aaya

har ek vaqt hai us kā har ek sur komal

ġhazal meñ ban ke vo ik bhairvīñ chalā aaya

ye kah ke gor bhī mujh par kushāda hone lagī

ḳhush-āmdīd ki merā makīñ chalā aaya

ab ehtiyāt se matlab nahīñ ‘alī-yāsir’

ki sāmne vo mirā nukta-chīñ chalā aaya

hai raushni mera azm-o-yaqin chala aaya

sitara hun main bara-e-zamin chala aaya

main sab se qimti KHilqat KHuda-e-qudrat ki

mera jawaz hai yunhi nahin chala aaya

hai meri aah mere qahqahon ki aahaT mein

aza-e-zist mein KHanda-jabin chala aaya

bisat-e-daman-e-sad-chaak teri qismat hai

tere visal ko aisa nagin chala aaya

ajab ghazab hai ki dil DhunDne laga KHud ko

idhar jo aaj wahi dil-nashin chala aaya

zamin se dad-rasi ki umid TuT chuki

so nala jaanib-e-arsh-e-barin chala aaya

KHayal tha ki mere doston ki mahfil hai

so dosto ye hua main yahin chala aaya

har ek waqt hai us ka har ek sur komal

ghazal mein ban ke wo ek bhairwin chala aaya

ye kah ke gor bhi mujh par kushada hone lagi

KHush-amdid ki mera makin chala aaya

ab ehtiyat se matlab nahin ‘ali-yasir’

ki samne wo mera nukta-chin chala aaya