hai sham suhani na sawera mere aage

hai shaam suhānī na saverā mire aage

dil rotā hai tanhā.ī kā ronā mire aage

vo hādsa-e-ishq mujhe yaad hai ab tak

hāthoñ se chhupānā tirā chehra mire aage

dil hāzir-o-māzī ke ho mābain muallaq

āñkhoñ meñ to hai sā.at-e-fardā mire aage

hai gulshan-e-hastī meñ har ik shai pe tajallī

har dam tirī qudrat kā hai jalva mire aage

tadbīr-o-tahammul to hai ho furqat o ġhurbat

mahrūmī-e-qismat hai tamāshā mire aage

marne kā hī ik ḳhvāb ho sharminda-e-ta.abīr

ho jalva-numā gumbad-e-ḳhazrā mire aage

kyā jāniye kyā zid hai mire ishq se un ko

nāseh mire pīchhe haiñ masīhā mire aage

aa tujh ko sikhā.ūñ maiñ mohabbat kā salīqa

is shahr meñ koī nahīñ tujh sā mire aage

dil jur.at-e-rindāna pe kyoñ kartā na ash-ash

vo karte rahe va.ada-e-fardā mire aage

hai sham suhani na sawera mere aage

dil rota hai tanhai ka rona mere aage

wo hadsa-e-ishq mujhe yaad hai ab tak

hathon se chhupana tera chehra mere aage

dil hazir-o-mazi ke ho mabain muallaq

aankhon mein to hai saat-e-farda mere aage

hai gulshan-e-hasti mein har ek shai pe tajalli

har dam teri qudrat ka hai jalwa mere aage

tadbir-o-tahammul to hai ho furqat o ghurbat

mahrumi-e-qismat hai tamasha mere aage

marne ka hi ek KHwab ho sharminda-e-tabir

ho jalwa-numa gumbad-e-KHazra mere aage

kya jaaniye kya zid hai mere ishq se un ko

naseh mere pichhe hain masiha mere aage

aa tujh ko sikhaun main mohabbat ka saliqa

is shahr mein koi nahin tujh sa mere aage

dil jurat-e-rindana pe kyon karta na ash-ash

wo karte rahe wada-e-farda mere aage