hai shahr-e-jaan ke pas hi virana dekhiye

hai shahr-e-jāñ ke paas hī vīrāna dekhiye

is dasht meñ junūñ kā Thahar jaanā dekhiye

kyūñkar hai aaj masti-e-rindāna dekhiye

saaqī hai kaun kaisā hai paimāna dekhiye

kar ke nigāh-e-nāz se 'āshiq ko zer-e-teġh

qātil kā qatl-gāh meñ sharmānā dekhiye

saare hasīn sub.h ke manzar haiñ bartaraf

bikhrī vo ruḳh pe kākul-e-jānāna dekhiye

tere hī dar pe miltā hai har dard ko sukūn

kaisā maraz hai kaisā davā-ḳhāna dekhiye

aksar maiñ ham-kalām huā huuñ ḳhudā ke saath

mujh se bashar meñ 'aks-e-kalīmāna dekhiye

tū mahv-e-raqs ābla-pā bhī rahā 'zahīr'

shauq-e-visāl-e-yār meñ dīvāna dekhiye

hai shahr-e-jaan ke pas hi virana dekhiye

is dasht mein junun ka Thahar jaana dekhiye

kyunkar hai aaj masti-e-rindana dekhiye

saqi hai kaun kaisa hai paimana dekhiye

kar ke nigah-e-naz se 'ashiq ko zer-e-tegh

qatil ka qatl-gah mein sharmana dekhiye

sare hasin subh ke manzar hain bartaraf

bikhri wo ruKH pe kakul-e-jaanana dekhiye

tere hi dar pe milta hai har dard ko sukun

kaisa maraz hai kaisa dawa-KHana dekhiye

aksar main ham-kalam hua hun KHuda ke sath

mujh se bashar mein 'aks-e-kalimana dekhiye

tu mahw-e-raqs aabla-pa bhi raha 'zahir'

shauq-e-visal-e-yar mein diwana dekhiye