hai sunana unhen bekar kisi aur ka dukh

hai sunānā unheñ bekār kisī aur kā dukh

jin ko hotā hī nahīñ yaar kisī aur kā dukh

koī dukh hai to mire dil ke havāle kar do

us ne bartā hai bahut baar kisī aur kā dukh

dekh letā hai akelā jo zamīñ par mujh ko

aah bhartā hai falak paar kisī aur kā dukh

roz kartā huuñ tire dukh kī talāfī aise

baañT letā huuñ mire yaar kisī aur kā dukh

log karte haiñ jo dukh-sukh meñ madad auroñ kī

un kā hotā hai madad-gār kisī aur kā dukh

roz detā hai mire dil pe tirā dukh dastak

oḌh letā huuñ maiñ har baar kisī aur kā dukh

maiñ sajā duuñ yahāñ tasvīr hamārī koī

maiñ lagā duuñ sar-e-dīvār kisī aur kā dukh

'izzat-e-nafs to muflis kī bhī hotī hogī

kyoñ baḌhātā hai riyā-kār kisī aur kā dukh

maiñ vo pāgal huuñ jise ḳhud se sarokār nahīñ

mujh se rakhtā hai sarokār kisī aur kā dukh

maiñ ne qasdan tire dukh se nahīñ āñkheñ pherīñ

dekh paatā nahīñ bīmār kisī aur kā dukh

ranj itne haiñ ki aatī nahīñ baarī apnī

roz likhtā hai qalam-kār kisī aur kā dukh

Thiik hai mujh meñ bahut hausla hogā lekin

merī bāñhoñ meñ na ro yaar kisī aur kā dukh

taaki mujh ko na mire dukh kī sadā.eñ aa.eñ

ab maiñ suntā huuñ lagātār kisī aur kā dukh

tere mantar se maiñ achchhā nahīñ hone vaalā

mujh pe taarī hai fusūñ-kār kisī aur kā dukh

jaise har dukh se zamāne ke ḳhalāsī hogī

yuuñ manāte haiñ azādār kisī aur kā dukh

us ko har sub.h har ik shaam hamārā dukh hai

ham ko din raat lagātār kisī aur kā dukh

hai sunana unhen bekar kisi aur ka dukh

jin ko hota hi nahin yar kisi aur ka dukh

koi dukh hai to mere dil ke hawale kar do

us ne barta hai bahut bar kisi aur ka dukh

dekh leta hai akela jo zamin par mujh ko

aah bharta hai falak par kisi aur ka dukh

roz karta hun tere dukh ki talafi aise

banT leta hun mere yar kisi aur ka dukh

log karte hain jo dukh-sukh mein madad auron ki

un ka hota hai madad-gar kisi aur ka dukh

roz deta hai mere dil pe tera dukh dastak

oDh leta hun main har bar kisi aur ka dukh

main saja dun yahan taswir hamari koi

main laga dun sar-e-diwar kisi aur ka dukh

'izzat-e-nafs to muflis ki bhi hoti hogi

kyon baDhata hai riya-kar kisi aur ka dukh

main wo pagal hun jise KHud se sarokar nahin

mujh se rakhta hai sarokar kisi aur ka dukh

main ne qasdan tere dukh se nahin aankhen pherin

dekh pata nahin bimar kisi aur ka dukh

ranj itne hain ki aati nahin bari apni

roz likhta hai qalam-kar kisi aur ka dukh

Thik hai mujh mein bahut hausla hoga lekin

meri banhon mein na ro yar kisi aur ka dukh

taki mujh ko na mere dukh ki sadaen aaen

ab main sunta hun lagatar kisi aur ka dukh

tere mantar se main achchha nahin hone wala

mujh pe tari hai fusun-kar kisi aur ka dukh

jaise har dukh se zamane ke KHalasi hogi

yun manate hain azadar kisi aur ka dukh

us ko har subh har ek sham hamara dukh hai

hum ko din raat lagatar kisi aur ka dukh