hai to koshish yahi dil dasht-e-tamanna na bane

hai to koshish yahī dil dasht-e-tamannā na bane

phir bhī bantā hai jo vīrāna to vīrāna bane

ḳhaak bhī jal ke ho parvāna phir us par ye sitam

ġhāza-e-sham.a bhī ḳhāk-e-par-e-parvāna bane

kuchh Dhale raat jo utreñ tirī nazreñ dil meñ

kuchh bane baat jo tū zīnat-e-kāshāna bane

jaise sannāToñ meñ dil gum hai na ho gum koī

yuuñ na sunsān ho yuuñ ghar koī sahrā na bane

vo jo chāhe to mile daulat-e-bedār-e-junūñ

vo na chāhe to koī kis tarah dīvāna bane

sochte haiñ ki is ik baat ko ham deñ kyā naam

jo haqīqat meñ Dhale aur na afsāna bane

kaun siine se lagā.e phire is dil ko 'zafar'

hosh meñ aa ke bhī jo hosh se begāna bane

hai to koshish yahi dil dasht-e-tamanna na bane

phir bhi banta hai jo virana to virana bane

KHak bhi jal ke ho parwana phir us par ye sitam

ghaza-e-shama bhi KHak-e-par-e-parwana bane

kuchh Dhale raat jo utren teri nazren dil mein

kuchh bane baat jo tu zinat-e-kashana bane

jaise sannaTon mein dil gum hai na ho gum koi

yun na sunsan ho yun ghar koi sahra na bane

wo jo chahe to mile daulat-e-bedar-e-junun

wo na chahe to koi kis tarah diwana bane

sochte hain ki is ek baat ko hum den kya nam

jo haqiqat mein Dhale aur na afsana bane

kaun sine se lagae phire is dil ko 'zafar'

hosh mein aa ke bhi jo hosh se begana bane