hai yaqin jis din chaman mein mohtaram ho jaenge

hai yaqīñ jis din chaman meñ mohtaram ho jā.eñge

kitnī āñkhoñ meñ ba-misl-e-ḳhār ham ho jā.eñge

tark kar deñ bolnā sach ham tumhāre ḳhauf se

ġham nahīñ hogā agar sar bhī qalam ho jā.eñge

tū batā rishta hai kyā terā vatan kī ḳhaak se

hai hameñ nisbat isī miTTī meñ zam ho jā.eñge

toḌnā itne sitam phūloñ pe ab achchhā nahīñ

shāḳh-e-gul se TuuT kar bikhre to bam ho jā.eñge

hausloñ meñ hai hamāre vo lachak ai āñdhiyo

be-asar ham par tumhāre sab sitam ho jā.eñge

baaz gar aa.e nahīñ fir.auniyat se hukmarāñ

kārvān-e-mūsvī kā ham alam ho jā.eñge

dekhnā TūTegā jis din sab kī nazroñ kā fusūñ

duur sab terī navāzish ke bharam ho jā.eñge

bas yūñhī chalte raho insāniyat kī raah par

haiñ muḳhālif jo tumhāre ham-qadam ho jā.eñge

sāya-e-dīvār par aañsū gireñge jab mire

chilchilātī dhuup ke dāman bhī nam ho jā.eñge

apnī dastār-e-ḳhudī hargiz na ashhar bechnā

haiñ ra.ūnat se tane jo sar bhī ḳham ho jā.eñge

hai yaqin jis din chaman mein mohtaram ho jaenge

kitni aankhon mein ba-misl-e-KHar hum ho jaenge

tark kar den bolna sach hum tumhaare KHauf se

gham nahin hoga agar sar bhi qalam ho jaenge

tu bata rishta hai kya tera watan ki KHak se

hai hamein nisbat isi miTTi mein zam ho jaenge

toDna itne sitam phulon pe ab achchha nahin

shaKH-e-gul se TuT kar bikhre to bam ho jaenge

hauslon mein hai hamare wo lachak ai aandhiyo

be-asar hum par tumhaare sab sitam ho jaenge

baz gar aae nahin firauniyat se hukmaran

karwan-e-muswi ka hum alam ho jaenge

dekhna TuTega jis din sab ki nazron ka fusun

dur sab teri nawazish ke bharam ho jaenge

bas yunhi chalte raho insaniyat ki rah par

hain muKHalif jo tumhaare ham-qadam ho jaenge

saya-e-diwar par aansu girenge jab mere

chilchilati dhup ke daman bhi nam ho jaenge

apni dastar-e-KHudi hargiz na ashhar bechna

hain raunat se tane jo sar bhi KHam ho jaenge