hai yaqin mujhe mera ham-nashin meri is ada se KHafa nahin

hai yaqīñ mujhe mirā ham-nashīñ mirī is adā se ḳhafā nahīñ

na jhukegā sar dar-e-husn par ki sanam sanam hai ḳhudā nahīñ

mirī aarzū mirī āshiqī hai junūñ kī shiddatoñ se barī

ye mazāq-e-nau hai baḌā ajab ki maiñ sirf tujh pe fidā nahīñ

zarā duur haiñ mirī manzileñ tū nazar uThā na ḳhafā ho yuuñ

mire ham-safar mirā rāsta tire rāste se judā nahīñ

hai jo ġham-zadoñ ke diloñ kā ġham vo hamāre dil kā bhī ġham bane

vo amiir ho ki ġharīb ho ye bashar bashar se judā nahīñ

jo ḳhushī milī hai vo kam sahī chalo ham sabhī use baañT leñ

na piye kisī kā koī lahū ki lahū hai zahr davā nahīñ

ye jo dil hai jām-e-ġharaz nahīñ ye makāñ tavīl-o-arīz hai

kisī dard ko na mile jagah mirā dil to aisā banā nahīñ

maiñ farār zaat se kyā karūñ hai ye zaat apne meñ kā.enāt

mujhe faḳhr hai mirī shā.irī mirī zindagī se judā nahīñ

hai yaqin mujhe mera ham-nashin meri is ada se KHafa nahin

na jhukega sar dar-e-husn par ki sanam sanam hai KHuda nahin

meri aarzu meri aashiqi hai junun ki shiddaton se bari

ye mazaq-e-nau hai baDa ajab ki main sirf tujh pe fida nahin

zara dur hain meri manzilen tu nazar uTha na KHafa ho yun

mere ham-safar mera rasta tere raste se juda nahin

hai jo gham-zadon ke dilon ka gham wo hamare dil ka bhi gham bane

wo amir ho ki gharib ho ye bashar bashar se juda nahin

jo KHushi mili hai wo kam sahi chalo hum sabhi use banT len

na piye kisi ka koi lahu ki lahu hai zahr dawa nahin

ye jo dil hai jam-e-gharaz nahin ye makan tawil-o-ariz hai

kisi dard ko na mile jagah mera dil to aisa bana nahin

main farar zat se kya karun hai ye zat apne mein kaenat

mujhe faKHr hai meri shairi meri zindagi se juda nahin