hai ye ibtida gham-e-ishq ki abhi zahr-e-gham piya jaega

hai ye ibtidā ġham-e-ishq kī abhī zahr-e-ġham piyā jā.egā

kabhī chaak hogā ye pairahan kabhī pairahan siyā jā.egā

ye ajiib ahd-e-tilism hai yahāñ ziist maut kī qism hai

yahāñ terī baat se munharif tujhe barmalā kiyā jā.egā

pakī fasl kaTne se peshtar na.e sar ugānā na bhūlnā

hai qafas-garoñ se muqābla isī taur hī jiyā jā.egā

dar-e-dil pe ḳhushiyoñ kī dastakeñ jo sunīñ to dard sisak uThā

maiñ janam janam se yahāñ huuñ ab mujhe dar-ba-dar kiyā jā.egā

yahāñ saare raste paTe haiñ lāshoñ se in ke biich sañbhal ke chal

tū safīr-e-amn hai lauT jā tujhe rāsta diyā jā.egā

koī sang hai ki jidhar se aa.e usī kī samt uchhāl duuñ

ye mohabbatoñ kā javāb hai zarā soch kar diyā jā.egā

mere log kitne haiñ bā-ḳhabar mujhe is se pahle ḳhabar na thī

kisī aur shaḳhs kā tazkira mire naam se kiyā jā.egā

yahāñ un pe hogī giraft jin pe ho dostoñ kā gumāñ 'sadaf'

vo jo dushmanoñ kī safoñ meñ hai use saath le liyā jā.egā

hai ye ibtida gham-e-ishq ki abhi zahr-e-gham piya jaega

kabhi chaak hoga ye pairahan kabhi pairahan siya jaega

ye ajib ahd-e-tilism hai yahan zist maut ki qism hai

yahan teri baat se munharif tujhe barmala kiya jaega

paki fasl kaTne se peshtar nae sar ugana na bhulna

hai qafas-garon se muqabla isi taur hi jiya jaega

dar-e-dil pe KHushiyon ki dastaken jo sunin to dard sisak uTha

main janam janam se yahan hun ab mujhe dar-ba-dar kiya jaega

yahan sare raste paTe hain lashon se in ke bich sanbhal ke chal

tu safir-e-amn hai lauT ja tujhe rasta diya jaega

koi sang hai ki jidhar se aae usi ki samt uchhaal dun

ye mohabbaton ka jawab hai zara soch kar diya jaega

mere log kitne hain ba-KHabar mujhe is se pahle KHabar na thi

kisi aur shaKHs ka tazkira mere nam se kiya jaega

yahan un pe hogi giraft jin pe ho doston ka guman 'sadaf'

wo jo dushmanon ki safon mein hai use sath le liya jaega