hai ye ek uqda ki is duniya mein log aate hain kyon

hai ye ik uqda ki is duniyā meñ log aate haiñ kyoñ

aur jo aanā hī hai to aa kar chale jaate haiñ kyoñ

zindagī ke irtiqā kī āḳhirī sūrat hai maut

ye haqīqat hai to is se log ghabrāte haiñ kyoñ

aap ne kab zahr gholā mere jām-e-zīst meñ

mujh se ab āñkheñ milāte aap sharmāte haiñ kyoñ

kyoñ nahīñ karte haiñ apne vāste jannat kī fikr

sabz-bāġh āḳhir ye vaa.iz ham ko dikhlāte haiñ kyoñ

kyā nahīñ vāqif haiñ ye ġhunche nizām-e-dahr se

ḳhaak meñ milne ko bāhar shāḳh se aate haiñ kyoñ

ibn-e-ādam se huī thī jis kī ḳhūnīñ ibtidā

vo kahānī zindagī meñ log dohrāte haiñ kyoñ

kyoñ nahīñ kah paate us ko aap ke jo dil meñ hai

kyoñ nahīñ hote adā alfāz haklāte haiñ kyoñ

hai jafā-e-dast-e-qudrat yā ḳhud insāñ kā sitam

ġham ke bādal bijliyoñ kī aag barsāte haiñ kyoñ

kuchh to un ke paas hai vo jis se ye mahrūm haiñ

shaah darveshoñ ke aage haath phailāte haiñ kyoñ

irtiqā-e-zehn ne āḳhir kahāñ pahuñchā diyā

is bharī duniyā meñ tanhā ḳhud ko ham paate haiñ kyoñ

aur gumrāhī kā baa.is hogī koshish aap kī

jo samajh se hai pare vo baat samjhāte haiñ kyoñ

hai hī kyā paas un ke do hāthoñ kī tāqat ke sivā

be-navāoñ se tavangar itnā ghabrāte haiñ kyoñ

zulm kā radd-e-amal fitrī hai is kā shikva kyā

Dar agar sho.aloñ se hai phir aag bhaḌkāte haiñ kyoñ

ham ne maanā mushkiloñ se aap kā hai sābiqa

kyoñ nahīñ laḌte 'valī' aap un se ghabrāte haiñ kyoñ

hai ye ek uqda ki is duniya mein log aate hain kyon

aur jo aana hi hai to aa kar chale jate hain kyon

zindagi ke irtiqa ki aaKHiri surat hai maut

ye haqiqat hai to is se log ghabraate hain kyon

aap ne kab zahr ghola mere jam-e-zist mein

mujh se ab aankhen milate aap sharmate hain kyon

kyon nahin karte hain apne waste jannat ki fikr

sabz-bagh aaKHir ye waiz hum ko dikhlate hain kyon

kya nahin waqif hain ye ghunche nizam-e-dahr se

KHak mein milne ko bahar shaKH se aate hain kyon

ibn-e-adam se hui thi jis ki KHunin ibtida

wo kahani zindagi mein log dohraate hain kyon

kyon nahin kah pate us ko aap ke jo dil mein hai

kyon nahin hote ada alfaz haklate hain kyon

hai jafa-e-dast-e-qudrat ya KHud insan ka sitam

gham ke baadal bijliyon ki aag barsate hain kyon

kuchh to un ke pas hai wo jis se ye mahrum hain

shah darweshon ke aage hath phailate hain kyon

irtiqa-e-zehn ne aaKHir kahan pahuncha diya

is bhari duniya mein tanha KHud ko hum pate hain kyon

aur gumrahi ka bais hogi koshish aap ki

jo samajh se hai pare wo baat samjhate hain kyon

hai hi kya pas un ke do hathon ki taqat ke siwa

be-nawaon se tawangar itna ghabraate hain kyon

zulm ka radd-e-amal fitri hai is ka shikwa kya

Dar agar shoalon se hai phir aag bhaDkate hain kyon

hum ne mana mushkilon se aap ka hai sabiqa

kyon nahin laDte 'wali' aap un se ghabraate hain kyon