hai ye mearaj-e-fana soKHta-samanon ki

hai ye me.arāj-e-fanā soḳhta-sāmānoñ kī

rūheñ lipTī huī haiñ sham.a se parvānoñ kī

āñdhiy.oñ kī hai kamī koī na tūfānoñ kī

ai junūñ pūchh na vahshat ke bayābānoñ kī

kā.enāt itnī hī thī aap ke dīvānoñ kī

dhajjiyāñ marne pe kuchh niklīñ garebānoñ kī

dard-mandān-e-mohabbat jise dil kahte haiñ

ek ujḌī huī bastī hai vo armānoñ kī

aable paañv ke jangal meñ hue sīna-sipar

raah kāñToñ ne jo rokī tire dīvānoñ kī

tīr-o-paikāñ kī huī ḳhūn-e-jigar se dāvat

phir bhī ḳhātir meñ kamī rah ga.ī mehmānoñ kī

husn ke dam se hai duniyā-e-mohabbat ābād

sham.a kahte haiñ jise jaan hai parvānoñ kī

kah rahī haiñ ye marīzān-e-junūñ kī nabzeñ

beḌiyāñ Dhīlī huī jaatī haiñ dīvānoñ kī

raT zabāñ ko hai tire naam kī allāh allāh

zikr terā hī suneñ fikr ye hai kānoñ kī

us kī sūrat kā tasavvur nahīñ jis kī sūrat

kitnī dīvānī tamannā.eñ haiñ dīvānoñ kī

kuchh sharar aahoñ ke haiñ raakh meñ dil ke pinhāñ

yahī duniyā hai tire soḳhta-sāmānoñ kī

apnā siina hai ki hai ganj-e-shahīdāñ 'muztar'

ek duniyā yahīñ madfūn hai armānoñ kī

hai ye mearaj-e-fana soKHta-samanon ki

ruhen lipTi hui hain shama se parwanon ki

aandhiyon ki hai kami koi na tufanon ki

ai junun puchh na wahshat ke bayabanon ki

kaenat itni hi thi aap ke diwanon ki

dhajjiyan marne pe kuchh niklin garebanon ki

dard-mandan-e-mohabbat jise dil kahte hain

ek ujDi hui basti hai wo armanon ki

aable panw ke jangal mein hue sina-sipar

rah kanTon ne jo roki tere diwanon ki

tir-o-paikan ki hui KHun-e-jigar se dawat

phir bhi KHatir mein kami rah gai mehmanon ki

husn ke dam se hai duniya-e-mohabbat aabaad

shama kahte hain jise jaan hai parwanon ki

kah rahi hain ye marizan-e-junun ki nabzen

beDiyan Dhili hui jati hain diwanon ki

raT zaban ko hai tere nam ki allah allah

zikr tera hi sunen fikr ye hai kanon ki

us ki surat ka tasawwur nahin jis ki surat

kitni diwani tamannaen hain diwanon ki

kuchh sharar aahon ke hain rakh mein dil ke pinhan

yahi duniya hai tere soKHta-samanon ki

apna sina hai ki hai ganj-e-shahidan 'muztar'

ek duniya yahin madfun hai armanon ki