hai zarre zarre mein jalwa-paira jamal tera shabab tera

hai zarre zarre meñ jalva-pairā jamāl terā shabāb terā

kisī ke dast-e-nigah ne ruḳh se ulaT diyā kyā naqāb terā

ye ruḳh pe sabza ye ġhuncha sā lab ye nargisī chashm sarv qāmat

huī hai takmīl-e-husn jis se vo hai mukammal shabāb terā

tujhe ḳhabar bhī hai ai falak kuchh ye kyā haqīqat hai raaz kyā hai

vo hai dil-e-dāġhdār merā samajh na tū āftāb terā

jo kātibān-e-amal the kāñdhoñ se mere vo haT ga.e ye kah kar

ki ho ga.ī pur kitāb terī kahāñ likheñ ham hisāb terā

ḳhudā hai tū tere ham haiñ bande hameñ nahīñ koī bahs is meñ

hamāre haq meñ hai ain rahmat savāb terā azaab terā

maiñ dekh letā jo tere jalve to ye taḌap ye kashish na hotī

idhar hai maa.il nigāh terī udhar hai haa.il hijāb terā

na ye hī bas meñ na vo hī bas meñ tū hī batā de ki kyā karūñ maiñ

idhar haiñ muztar nigāheñ merī udhar hai maane hijāb terā

firāq meñ un ke zindagī bhar jo taḌpe sābir to kuchh na taḌpe

maza to jab hai ki ba.ad-e-murdan bhī kam na ho iztirāb terā

hai zarre zarre mein jalwa-paira jamal tera shabab tera

kisi ke dast-e-nigah ne ruKH se ulaT diya kya naqab tera

ye ruKH pe sabza ye ghuncha sa lab ye nargisi chashm sarw qamat

hui hai takmil-e-husn jis se wo hai mukammal shabab tera

tujhe KHabar bhi hai ai falak kuchh ye kya haqiqat hai raaz kya hai

wo hai dil-e-daghdar mera samajh na tu aaftab tera

jo katiban-e-amal the kandhon se mere wo haT gae ye kah kar

ki ho gai pur kitab teri kahan likhen hum hisab tera

KHuda hai tu tere hum hain bande hamein nahin koi bahs is mein

hamare haq mein hai ain rahmat sawab tera azab tera

main dekh leta jo tere jalwe to ye taDap ye kashish na hoti

idhar hai mail nigah teri udhar hai hail hijab tera

na ye hi bas mein na wo hi bas mein tu hi bata de ki kya karun main

idhar hain muztar nigahen meri udhar hai mane hijab tera

firaq mein un ke zindagi bhar jo taDpe sabir to kuchh na taDpe

maza to jab hai ki baad-e-murdan bhi kam na ho iztirab tera