hain ahl-e-nazar yahan pe sabhi ghalat koi kaam ho na sake

haiñ ahl-e-nazar yahāñ pe sabhī ġhalat koī kaam ho na sake

sharāb-e-kuhan vo pī ke chale jo mast-e-ḳhirām ho na sake

na koī lagan na dil meñ chubhan na rashk-e-suḳhan na rañg-e-chaman

nahīñ thā jinheñ shu.ūr-e-vafā vo 'aalī maqām ho na sake

jo tīra-shabī ne chhoḌā mujhe to dil se mire uThī ye sadā

ujāle zarā ḳhayāl rahe sahar kabhī shaam ho na sake

the hoñT mire usī ke liye zamāne se be-qarār magar

ye qaid mujhe lagā dī ga.ī ki lab pe vo naam ho na sake

lahū meñ nahā ke vo hī chalā likhā thā jabīñ pe jis kī ḳhudā

the aur bhī da.ave-dār yahāñ magar vo imaam ho na sake

ḳharīd ke lā na pāoge tum mileñge nahīñ dūkāñ pe usuul

the sāhab-e-zar hazār magar vafā ke ġhulām ho na sake

bañdhā ke mirī umiid kisī ne duur kahīñ khilā.e gulāb

thā shauq-e-junūñ balā kā magar payām-o-salām ho na sake

hain ahl-e-nazar yahan pe sabhi ghalat koi kaam ho na sake

sharab-e-kuhan wo pi ke chale jo mast-e-KHiram ho na sake

na koi lagan na dil mein chubhan na rashk-e-suKHan na rang-e-chaman

nahin tha jinhen shuur-e-wafa wo 'ali maqam ho na sake

jo tira-shabi ne chhoDa mujhe to dil se mere uThi ye sada

ujale zara KHayal rahe sahar kabhi sham ho na sake

the honT mere usi ke liye zamane se be-qarar magar

ye qaid mujhe laga di gai ki lab pe wo nam ho na sake

lahu mein naha ke wo hi chala likha tha jabin pe jis ki KHuda

the aur bhi dawe-dar yahan magar wo imam ho na sake

KHarid ke la na paoge tum milenge nahin dukan pe usul

the sahab-e-zar hazar magar wafa ke ghulam ho na sake

bandha ke meri umid kisi ne dur kahin khilae gulab

tha shauq-e-junun bala ka magar payam-o-salam ho na sake