hain jitne bhi rup zindagi ke kisi pe na etibar aaya

haiñ jitne bhī ruup zindagī ke kisī pe na e'tibār aayā

vahāñ se dāman bachā ke guzre jahāñ pe koī farār aayā

huī jo taqsīm rāhatoñ kī ināyatoñ kī yā chāhatoñ kī

kisī ke hisse meñ nā-rasā.ī kisī ke bas intizār aayā

vo jis se dil ke haiñ diip jalte bas ek chehra hai shahar bhar meñ

us ek chehre pe jaane kaise hamārā dil baar baar aayā

havāoñ kī thī adā nirālī ghaTā.eñ chhā.ī thiiñ kaalī kaalī

sambhāle dil muntazir rahe ham na abr barsā na yaar aayā

jinheñ nibhāne meñ umr biitī unheñ gañvāyā bas ek pal meñ

vahīñ pe rishtoñ kā maan TuuTā jahāñ diloñ meñ ġhubār aayā

ye dil bhī kaisī ajiib shai hai vo māñge jo ki na mil sake hai

jo duur hai us kī dastaras se usī pe ḳhud ko hai haar aayā

hain jitne bhi rup zindagi ke kisi pe na e'tibar aaya

wahan se daman bacha ke guzre jahan pe koi farar aaya

hui jo taqsim rahaton ki inayaton ki ya chahaton ki

kisi ke hisse mein na-rasai kisi ke bas intizar aaya

wo jis se dil ke hain dip jalte bas ek chehra hai shahar bhar mein

us ek chehre pe jaane kaise hamara dil bar bar aaya

hawaon ki thi ada nirali ghaTaen chhai thin kali kali

sambhaale dil muntazir rahe hum na abr barsa na yar aaya

jinhen nibhane mein umr biti unhen ganwaya bas ek pal mein

wahin pe rishton ka man TuTa jahan dilon mein ghubar aaya

ye dil bhi kaisi ajib shai hai wo mange jo ki na mil sake hai

jo dur hai us ki dastaras se usi pe KHud ko hai haar aaya