hain KHwahishat ziyaada jahan kuchh kam hai

haiñ ḳhvāhishāt ziyāda jahān kuchh kam hai

kahīñ zamīñ to kahīñ āsmān kuchh kam hai

har ek pal yahī ehsās khaa.e jaatā hai

zarūratoñ ke mutābiq makān kuchh kam hai

ai zindagī maiñ tirī chhāñv ko tarastā huuñ

jahāñ hai dhuup vahīñ sā.ebān kuchh kam hai

har ek lafz pe ehsās hotā jaatā hai

sunā.e haq ko hamārī zabān kuchh kam hai

tumhārā dil bhī kahīñ aur lag gayā hai 'nūr'

so vo bhī pahle se ab mehrbān kuchh kam hai

hain KHwahishat ziyaada jahan kuchh kam hai

kahin zamin to kahin aasman kuchh kam hai

har ek pal yahi ehsas khae jata hai

zaruraton ke mutabiq makan kuchh kam hai

ai zindagi main teri chhanw ko tarasta hun

jahan hai dhup wahin saeban kuchh kam hai

har ek lafz pe ehsas hota jata hai

sunae haq ko hamari zaban kuchh kam hai

tumhaara dil bhi kahin aur lag gaya hai 'nur'

so wo bhi pahle se ab mehrban kuchh kam hai