hain manazir sab baham-parda nazar baqi nahin

haiñ manāzir sab baham-parda nazar baaqī nahīñ

sāmne manzil hai lekin rahguzar baaqī nahīñ

shā.irī jis ne chhuḌā.e the jahāñ ke kārobār

ab takalluf bartaraf is meñ hunar baaqī nahīñ

shahr-e-nau meñ kyuuñ rahe ab ye shikasta sā makāñ

gar khaḌī dīvār koī hai to dar baaqī nahīñ

vo to jaadū kā banā thā haa.e aisā hī na ho

lauT kar pahuñchūñ to dekhūñ ab vo ghar baaqī nahīñ

mutma.in the ḳhush the aur duniyā meñ bhī masrūf the

ham to samjhe the ki ab fan kā safar baaqī nahīñ

ab ye lāzim hai ki is duniyā meñ jiinā siikh luuñ

ḳhuub par qaane rahūñ jab ḳhūb-tar baaqī nahīñ

aap sone kā qafas laane kī zahmat mat kareñ

ham vo taa.ir haiñ ki jin ke bāl-o-par baaqī nahīñ

hain manazir sab baham-parda nazar baqi nahin

samne manzil hai lekin rahguzar baqi nahin

shairi jis ne chhuDae the jahan ke karobar

ab takalluf bartaraf is mein hunar baqi nahin

shahr-e-nau mein kyun rahe ab ye shikasta sa makan

gar khaDi diwar koi hai to dar baqi nahin

wo to jadu ka bana tha hae aisa hi na ho

lauT kar pahunchun to dekhun ab wo ghar baqi nahin

mutmain the KHush the aur duniya mein bhi masruf the

hum to samjhe the ki ab fan ka safar baqi nahin

ab ye lazim hai ki is duniya mein jina sikh lun

KHub par qane rahun jab KHub-tar baqi nahin

aap sone ka qafas lane ki zahmat mat karen

hum wo tair hain ki jin ke baal-o-par baqi nahin