hain meri nigahon mein aagahi ki taswiren

haiñ mirī nigāhoñ meñ āgahī kī tasvīreñ

zulmatoñ se nikleñgī raushnī kī tasvīreñ

is qadar na detī ġham ye hayāt kī talḳhī

kaash mo'tabar hotīñ zindagī kī tasvīreñ

vo nuqūsh maazī ke ab nazar nahīñ aate

kitnī jald badlī haiñ aadmī kī tasvīreñ

aaj kī ye tārīkī nuur ban ke chamkegī

ruḳh badalne vaalī haiñ raushnī kī tasvīreñ

ai buland-parvāzo pastiyoñ kī samt aao

ham tumheñ dikhā.eñge zindagī kī tasvīreñ

rahbarī ke parde meñ ḳhud-numā.ī hotī hai

aur kar bhī kyā letīñ ye ḳhudī kī tasvīreñ

ek is ḳharābī se qāfile bhaTakte haiñ

raah se haTā diije gumrahī kī tasvīreñ

zindagī kī rāhoñ meñ jis taraf bhī jaatā huuñ

aap hī ke naqshe haiñ aap hī kī tasvīreñ

shaiḳh hai barahman hai mohtasib hai 'maikash' hai

kitne ruup dhāreñgī aadmī kī tasvīreñ

hain meri nigahon mein aagahi ki taswiren

zulmaton se niklengi raushni ki taswiren

is qadar na deti gham ye hayat ki talKHi

kash mo'tabar hotin zindagi ki taswiren

wo nuqush mazi ke ab nazar nahin aate

kitni jald badli hain aadmi ki taswiren

aaj ki ye tariki nur ban ke chamkegi

ruKH badalne wali hain raushni ki taswiren

ai buland-parwazo pastiyon ki samt aao

hum tumhein dikhaenge zindagi ki taswiren

rahbari ke parde mein KHud-numai hoti hai

aur kar bhi kya letin ye KHudi ki taswiren

ek is KHarabi se qafile bhaTakte hain

rah se haTa dije gumrahi ki taswiren

zindagi ki rahon mein jis taraf bhi jata hun

aap hi ke naqshe hain aap hi ki taswiren

shaiKH hai barahman hai mohtasib hai 'maikash' hai

kitne rup dhaarengi aadmi ki taswiren