hain motaqid-e-saqi yaran-e-haram kitne

haiñ mo'taqid-e-sāqī yārān-e-haram kitne

ka.abe se ḳhumistāñ tak haiñ naqsh-e-qadam kitne

vaa.iz kā gila kyā jab sochā na barahman ne

ik dil ke banāne meñ kaam aa.e sanam kitne

us jān-e-taġhāful kī taklīf-e-tabassum se

aañsū hue jaate haiñ shā.ista-e-ġham kitne

nāmūs-e-ta.alluq kī saugand zarā socho

bargashta ho tum kitne vārafta haiñ ham kitne

piine kī nahīñ lekin laġhzish kī parakh hogī

ab dekhiye mahfil meñ khulte haiñ bharam kitne

ye baat batā kar ham kyoñ ġham ko kareñ rusvā

haiñ ahl-e-karam kitne haiñ ahl-e-sitam kitne

arbāb-e-alam aañsū piite hī ga.e phir bhī

dekho to zarā 'jauhar' dāman hue nam kitne

hain mo'taqid-e-saqi yaran-e-haram kitne

kabe se KHumistan tak hain naqsh-e-qadam kitne

waiz ka gila kya jab socha na barahman ne

ek dil ke banane mein kaam aae sanam kitne

us jaan-e-taghaful ki taklif-e-tabassum se

aansu hue jate hain shaista-e-gham kitne

namus-e-talluq ki saugand zara socho

bargashta ho tum kitne warafta hain hum kitne

pine ki nahin lekin laghzish ki parakh hogi

ab dekhiye mahfil mein khulte hain bharam kitne

ye baat bata kar hum kyon gham ko karen ruswa

hain ahl-e-karam kitne hain ahl-e-sitam kitne

arbab-e-alam aansu pite hi gae phir bhi

dekho to zara 'jauhar' daman hue nam kitne