hain reg-zar-e-waqt pe sare nishan kahan

haiñ reg-zār-e-vaqt pe saare nishāñ kahāñ

kyā jaane zindagī kā gayā kārvāñ kahāñ

ārām lene detā hai daur-e-zamāñ kahāñ

Thahre jo raah meñ to ruke kārvāñ kahāñ

bachtā hai baaḌh bāñdhe se bhī gulsitāñ kahāñ

ruktī hai rokne se bhī aatī ḳhizāñ kahāñ

zindāñ kahāñ sulagtā huā āshiyāñ kahāñ

pahuñchā sunāmī le ke kahāñ se dhuāñ kahāñ

ham ne tumheñ kiyā hai ġham-e-dil bayāñ kahāñ

duniyā magar samajhtī hai dil kī zabāñ kahāñ

hai faḳhr kī ye baat ki vo ham ko āzmā.eñ

varna har ik kā hotā hai yuuñ imtihāñ kahāñ

duniyā meñ aadmī ko sukūñ kī talāsh thī

dīvāna-vār DhūñDhā hai us ko kahāñ kahāñ

ham apne hī vajūd ke sahrā meñ kho ga.e

āḳhir talāsh karte kisī kā nishāñ kahāñ

apnī bisāt bhar to uḌā aadmī magar

ye ek musht-e-ḳhāk kahāñ āsmāñ kahāñ

jis meñ laboñ ke saath gum āhañg-e-dil bhī ho

insān hone paatā hai yuuñ shādmāñ kahāñ

koī na ho to rahtī hai parchhā.īñ apne saath

sūraj kī raushnī meñ haiñ tanhā.iyāñ kahāñ

hotā hai dostoñ hī se ārām-e-jāñ nasīb

sab ko magar nasīb ye ārām-e-jāñ kahāñ

jaanā thā ruuh ko to badan se nikal ga.ī

sāñseñ ulajh ulajh ke ye bolīñ kahāñ kahāñ

jiine kī zimmedāriyāñ kyoñ ham ne kiiñ qubūl

ab pheñk aa.eñ jā ke ye bār-e-garāñ kahāñ

yaaro mujhe añdhere meñ tum chhoḌ to ga.e

mujh se chhupā ga.e mirī parchhā.iyāñ kahāñ

jab tīrgī meñ jismoñ kī pahchān hai muhāl

paikar ko apne DhūñDheñgī parchhā.iyāñ kahāñ

jis meñ sukūñ ho ġham kī rasā.ī jahāñ na ho

aisī koī zamīn kahāñ āsmāñ kahāñ

tārāji-e-chaman kā nazāra to dekh jaao

phir dekhne ko pāoge aisā samāñ kahāñ

qurbānī dene vaale to barbād ho ga.e

qurbāniyāñ huī haiñ magar rā.egāñ kahāñ

jo ek dūsre kī haqīqat chhupā sake

aisā hijāb un ke mire darmiyāñ kahāñ

kyoñ ustuvār tum ne azal meñ kiyā use

ab TūTtā hai rābta-e-jism-o-jāñ kahāñ

kitnī hī vārdāteñ bayāñ ho nahīñ sakīñ

puurī huī hai dil kī abhī dāstāñ kahāñ

har daur meñ lage hue tañgi-e-dil ke qufl

hogā ġharīb-e-shahr koī mehmāñ kahāñ

tum sāmne ho aur maiñ gum apne aap meñ

pahuñchā diyā ye tum ne mujhe nā-gahāñ kahāñ

kah leñ 'sarosh' koī ġhazal ik nashist meñ

dhārā ab apnī fikr kā aisā ravāñ kahāñ

hain reg-zar-e-waqt pe sare nishan kahan

kya jaane zindagi ka gaya karwan kahan

aaram lene deta hai daur-e-zaman kahan

Thahre jo rah mein to ruke karwan kahan

bachta hai baDh bandhe se bhi gulsitan kahan

rukti hai rokne se bhi aati KHizan kahan

zindan kahan sulagta hua aashiyan kahan

pahuncha sunami le ke kahan se dhuan kahan

hum ne tumhein kiya hai gham-e-dil bayan kahan

duniya magar samajhti hai dil ki zaban kahan

hai faKHr ki ye baat ki wo hum ko aazmaen

warna har ek ka hota hai yun imtihan kahan

duniya mein aadmi ko sukun ki talash thi

diwana-war DhunDha hai us ko kahan kahan

hum apne hi wajud ke sahra mein kho gae

aaKHir talash karte kisi ka nishan kahan

apni bisat bhar to uDa aadmi magar

ye ek musht-e-KHak kahan aasman kahan

jis mein labon ke sath gum aahang-e-dil bhi ho

insan hone pata hai yun shadman kahan

koi na ho to rahti hai parchhain apne sath

suraj ki raushni mein hain tanhaiyan kahan

hota hai doston hi se aaram-e-jaan nasib

sab ko magar nasib ye aaram-e-jaan kahan

jaana tha ruh ko to badan se nikal gai

sansen ulajh ulajh ke ye bolin kahan kahan

jine ki zimmedariyan kyon hum ne kin qubul

ab phenk aaen ja ke ye bar-e-garan kahan

yaro mujhe andhere mein tum chhoD to gae

mujh se chhupa gae meri parchhaiyan kahan

jab tirgi mein jismon ki pahchan hai muhaal

paikar ko apne DhunDhengi parchhaiyan kahan

jis mein sukun ho gham ki rasai jahan na ho

aisi koi zamin kahan aasman kahan

taraji-e-chaman ka nazara to dekh jao

phir dekhne ko paoge aisa saman kahan

qurbani dene wale to barbaad ho gae

qurbaniyan hui hain magar raegan kahan

jo ek dusre ki haqiqat chhupa sake

aisa hijab un ke mere darmiyan kahan

kyon ustuwar tum ne azal mein kiya use

ab TuTta hai rabta-e-jism-o-jaan kahan

kitni hi wardaten bayan ho nahin sakin

puri hui hai dil ki abhi dastan kahan

har daur mein lage hue tangi-e-dil ke qufl

hoga gharib-e-shahr koi mehman kahan

tum samne ho aur main gum apne aap mein

pahuncha diya ye tum ne mujhe na-gahan kahan

kah len 'sarosh' koi ghazal ek nashist mein

dhaara ab apni fikr ka aisa rawan kahan