hairan hun ki ye kaun sa dastur-e-wafa hai

hairāñ huuñ ki ye kaun sā dastūr-e-vafā hai

tū misl-e-rag-e-jāñ hai to kyuuñ mujh se judā hai

tū ahl-e-nazar hai to nahīñ tujh ko ḳhabar kyuuñ

pahlū meñ tire koī zamāne se khaḌā hai

likkhā hai mirā naam samundar pe havā ne

aur dono kī fitrat meñ sukūñ hai na vafā hai

maiñ shahr-o-bayābāñ meñ tujhe DhūñDh chukā huuñ

be-dard tū kis hajla-pinhāñ meñ chhupā hai

ham rakhte haiñ da.avā ki hai qaabū hameñ dil par

tū sāmne aa jaa.e to ye baat judā hai

maiñ dozaḳh-e-jāñ meñ bhī rahā mahv-e-tag-o-tāz

ai ḳhāliq-e-aflāq tujhe to ye patā hai

ġham hai ki musalsal usī shiddat se hai jaarī

yuuñ kahne ko is umr kā har lamha nayā hai

har samt havā tez fazā tā-ba-ufuq tañg

dil zarra-e-sahrā hai bagūloñ meñ ghirā hai

kyuuñ jaage hue shahr meñ tanhā hai har ik shaḳhs

ye raushnī kaisī hai ki saaya bhī judā hai

ai dāvar-e-mahshar tujhe ḳhud terī qasam hai

insāf se kah dil kabhī terā bhī phaTā hai

mahsūs kiyā hai kabhī tū ne bhī vo ḳhanjar

ġham ban ke jo har shaḳhs ke siine meñ gaḌā hai

Thahrā.e use 'arsh' koī kaise jafā-kesh

jo mujh se alag rah ke bhī hamrāh chalā hai

hairan hun ki ye kaun sa dastur-e-wafa hai

tu misl-e-rag-e-jaan hai to kyun mujh se juda hai

tu ahl-e-nazar hai to nahin tujh ko KHabar kyun

pahlu mein tere koi zamane se khaDa hai

likkha hai mera nam samundar pe hawa ne

aur dono ki fitrat mein sukun hai na wafa hai

main shahr-o-bayaban mein tujhe DhunDh chuka hun

be-dard tu kis hajla-pinhan mein chhupa hai

hum rakhte hain dawa ki hai qabu hamein dil par

tu samne aa jae to ye baat juda hai

main dozaKH-e-jaan mein bhi raha mahw-e-tag-o-taz

ai KHaliq-e-aflaq tujhe to ye pata hai

gham hai ki musalsal usi shiddat se hai jari

yun kahne ko is umr ka har lamha naya hai

har samt hawa tez faza ta-ba-ufuq tang

dil zarra-e-sahra hai bagulon mein ghira hai

kyun jage hue shahr mein tanha hai har ek shaKHs

ye raushni kaisi hai ki saya bhi juda hai

ai dawar-e-mahshar tujhe KHud teri qasam hai

insaf se kah dil kabhi tera bhi phaTa hai

mahsus kiya hai kabhi tu ne bhi wo KHanjar

gham ban ke jo har shaKHs ke sine mein gaDa hai

Thahrae use 'arsh' koi kaise jafa-kesh

jo mujh se alag rah ke bhi hamrah chala hai