hairat aur iztirab ko ham-sar karunga main

hairat aur iztirāb ko ham-sar karūñgā maiñ

dekhūñgā tujh ko aañkh ko patthar karūñgā maiñ

āñdhī ko oḌh lūñgā zarūrat paḌī agar

taptī huī chaTān ko bistar karūñgā maiñ

logoñ ko ek shaam dikhā.ūñgā mo.ajiza

saa.e ko apne qad ke barābar karūñgā maiñ

sāñpoñ ko dostoñ se bhī Dasvā.uñgā kabhī

dekhoge ye tamāshā saḌak par karūñgā maiñ

yā apnī band muTThiyāñ dekhūñgā ġhaur se

varna ḳhayāl-e-dast-e-sikandar karūñgā maiñ

'ġhālib' ke ba.ad urdu ġhazal mar ga.ī 'nizām'

murde pe aisā kaun sā mantar karūñgā maiñ

hairat aur iztirab ko ham-sar karunga main

dekhunga tujh ko aankh ko patthar karunga main

aandhi ko oDh lunga zarurat paDi agar

tapti hui chaTan ko bistar karunga main

logon ko ek sham dikhaunga moajiza

sae ko apne qad ke barabar karunga main

sanpon ko doston se bhi Daswaunga kabhi

dekhoge ye tamasha saDak par karunga main

ya apni band muTThiyan dekhunga ghaur se

warna KHayal-e-dast-e-sikandar karunga main

'ghaalib' ke baad urdu ghazal mar gai 'nizam'

murde pe aisa kaun sa mantar karunga main