hal hi na ho jis ka wo muamma to nahin hai

hal hī na ho jis kā vo muammā to nahīñ hai

maktūb-e-azal harf-e-tamannā to nahīñ hai

dil hī kī ḳhudā.ī hai yahāñ aaj bhī ai dost

pāband-e-nazar kaif kī duniyā to nahīñ hai

be-bahra-e-irfān-e-mohabbat hai azal se

sochā hai tujhe aql ne dekhā to nahīñ hai

andoh ba-dāmāñ na ho ḳhud mauj-tarannum

āvāz kā har sho.abada naġhmā to nahīñ hai

har raah nazar aane lage mujh ko rah-e-rāst

be-rāh-ravī terā ye manshā to nahīñ hai

ġham kyā agar āzād-e-musalsal hai mirī ziist

minnat-kash-e-ejāz-e-masīhā to nahīñ hai

'yāqūb' sunānā hai mujhe dil kī zabāñ meñ

afsāne kā pahlū koī tishnā to nahīñ hai

hal hi na ho jis ka wo muamma to nahin hai

maktub-e-azal harf-e-tamanna to nahin hai

dil hi ki KHudai hai yahan aaj bhi ai dost

paband-e-nazar kaif ki duniya to nahin hai

be-bahra-e-irfan-e-mohabbat hai azal se

socha hai tujhe aql ne dekha to nahin hai

andoh ba-daman na ho KHud mauj-tarannum

aawaz ka har shoabada naghma to nahin hai

har rah nazar aane lage mujh ko rah-e-rast

be-rah-rawi tera ye mansha to nahin hai

gham kya agar aazad-e-musalsal hai meri zist

minnat-kash-e-ejaz-e-masiha to nahin hai

'yaqub' sunana hai mujhe dil ki zaban mein

afsane ka pahlu koi tishna to nahin hai