halak-e-jafa-o-wafa ho raha hun

halāk-e-jafā-o-vafā ho rahā huuñ

ki ik banda-e-be-ḳhudā ho rahā huuñ

nahīñ ye junūn-e-mohabbat nahīñ hai

maiñ aap aap se āshnā ho rahā huuñ

mirā har qadam naqsh-e-rāh-e-talab hai

tirī raah kā rahnumā ho rahā huuñ

udhar karb kī manzileñ baḌh rahī haiñ

idhar dard-e-dil kī davā ho rahā huuñ

na chheḌo abhī sāz-e-ulfat pe naġhma

abhī apne dil kī sadā ho rahā huuñ

yahī hai yahī sheva-e-ishq hamdam

maiñ ḳhud mubtalā-e-jafā ho rahā huuñ

jabīñ rakh ke saaqī ke qadmoñ meñ 'jauhar'

ḳhudā jaane ab kyā se kyā ho rahā huuñ

halak-e-jafa-o-wafa ho raha hun

ki ek banda-e-be-KHuda ho raha hun

nahin ye junun-e-mohabbat nahin hai

main aap aap se aashna ho raha hun

mera har qadam naqsh-e-rah-e-talab hai

teri rah ka rahnuma ho raha hun

udhar karb ki manzilen baDh rahi hain

idhar dard-e-dil ki dawa ho raha hun

na chheDo abhi saz-e-ulfat pe naghma

abhi apne dil ki sada ho raha hun

yahi hai yahi shewa-e-ishq hamdam

main KHud mubtala-e-jafa ho raha hun

jabin rakh ke saqi ke qadmon mein 'jauhar'

KHuda jaane ab kya se kya ho raha hun